اسكەري مىندەتىن وتەگەندەر مەملەكەتتىك ورگاندارعا جۇمىسقا ورنالاسادى

نۇر-سۇلتان. قازاقپارات - قازاقستاندا شۇعىل اسكەري مىندەتىن وتەۋگە قىزىعۋشىلىقتى ارتتىرۋ ماقساتىندا ءبىرقاتار شارا قابىلداندى.

ول تۋرالى قورعانىس ءمينيسترىنىڭ ورىنباسارى، گەنەرال-لەيتەنانت سۇلتان كامالەتدينوۆ ءمالىم ەتتى، دەپ حابارلايدى قازاقپارات ءتىلشىسى.

«مەملەكەت باسشىسىنىڭ تاپسىرماسىنا سايكەس، اسكەر قىزمەتى سالاسىندا ءبىرقاتار باستاما قولعا الىنىپ جاتىر. سونىڭ ىشىندە شۇعىل اسكەرگە قىزىعۋشىلىقتى ارتتىرۋ دا بار. اتاپ ايتقاندا، كرەديتى بار شۇعىل اسكەري مىندەتىن وتەۋشىلەردى تولەمنەن ۋاقىتشا بوساتۋ، ساربازداردىڭ وتباسىنا كوممۋنالدىق قىزمەت اقىسىن تولەۋدە جەڭىلدىك جاساۋ سىندى شارۋالار اتقارىلادى. سونىمەن قاتار ءبىلىم بەرۋ سالاسىندا دا جەڭىلدىكتەر قاراستىرىلىپ جاتىر. ودان بولەك، اسكەري مىندەتىن وتەگەن سوڭ ولاردى مەملەكەتتىك ورگاندارعا جۇمىسقا ورنالاستىرۋ جوسپارى بار»، - دەدى سۇلتان كامالەتدينوۆ ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا.

ونىڭ ايتۋىنشا، شۇعىل اسكەري مىندەتىن وتۋشىلەردىڭ ءبىلىم الۋىنا ەرەكشە ءمان بەرىلمەك.

«وسى ورايدا ءبىزدىڭ مينيسترلىك ەڭبەك نارىعىندا سۇرانىسقا يە 16 ماماندىق بويىنشا وقىتادى. ونىڭ قاتارىندا تراكتور جۇرگىزۋشىسى، دانەكەرلەۋشى، كران جۇرگىزۋشىسى، تاعى سول سياقتى ماماندىقتار بار. وسىلايشا جاستار اسكەري مىندەتىمەن قاتار، سۇرانىسقا ساي ماماندىقتى مەڭگەرىپ شىعادى. ءبىلىمدى مىندەتىن وتەپ جاتقان اسكەري ءبولىم جانە اسكەري وقۋ ورتالىقتارىندا الادى»، - دەيدى ول.

اۆتور: ءالي يبرايەۆ