قىزىلوردالىق عالىمدار كوكونىس-باقشا ونىمدىلىگىن ارتتىراتىن جاڭا جوبا ويلاپ تاپتى

يننوۆاتسيالىق جوبا توپىراق قۇنارلىلىعىن جاقسارتۋعا باعىتتالعان. اتاپ ايتقاندا، كۇرىش قالدىقتارىن قايتا وڭدەۋ كەزىندە الىناتىن بيوتىڭايتقىش كارتوپ، ءسابىز، قىزاناق، قيار، قاۋىن جانە قاربىز سەكىلدى كوكونىس جانە باقشا داقىلدارىنىڭ ونىمدىلىگىن ارتتىرادى.
«بۇل جوبا الداعى ۋاقىتتا وندىرىسكە ەنگىزىلەدى. زەرتتەۋ جۇمىسىن ۋنيۆەرسيتەتتىڭ ينجەنەرلىك بەيىندەگى زەرتحانا جەتەكشىسى، حيميا عىلىمدارىنىڭ كانديداتى نۇرلىبەك احاتايەۆ باستاعان عالىمدار جۇرگىزدى. ول وسىمدىكتەردى قورعاۋ قۇرالدارىن، بيوتىڭايتقىشتار ازىرلەۋ، توپىراقتىڭ قۇنارلىلىعى مەن سيپاتتامالارىن جاقسارتۋ سالاسىن زەرتتەپ كەلەدى. قازىرگى تاڭدا 70 تەن اسا عىلىمي جۇمىسى بار»، - دەپ جازىلعان قورقىت اتا اتىنداعى قىزىلوردا ۋنيۆەرسيتەتىنىڭ حابارلاماسىندا.
عالىمدار وبلىستىق اۋىل شارۋاشىلىعى باسقارماسى ۇيىمداستىرعان اگروونەركاسىپتىك كەشەن سالاسىنداعى يننوۆاتسيالىق جوبالار كونكۋرسىنا قاتىسقان بولاتىن. بايقاۋ ناتيجەسىندە ۋنيۆەرسيتەتتىڭ ەكى جوباسى 32 ميلليون تەڭگە قارجىلاي قولداۋ تاپتى.
جاڭا جوبانى قارماقشى اۋدانى تۇرماعانبەت اۋىلىنداعى سەرىكتەستىك قولدانىسقا ەنگىزۋدى جوسپارلاپ وتىر.
ەسكە سالا كەتسەك، شىمكەنتتىك جاس عالىمدار قانتتان دا ءتاتتى ءونىم بەرەتىن وسىمدىك ەكتى.