كەلەسى رامازانعا دەيىن امان-ەسەن جەتىپ، مول ساۋاپقا كەنەلۋدى ءناسىپ ەتكەي - باس ءمۇفتي

نۇر-سۇلتان. قازاقپارات - قازاقستان مۇسىلماندارى ءدىني باسقارماسىنىڭ ءتوراعاسى، باس ءمۇفتي ناۋرىزباي قاجى تاعان ۇلى حالىقتى ورازا ايت مەرەكەسىمەن قۇتتىقتادى، دەپ حابارلايدى قازاقپارات ق م د ب باسپا ءسوز قىزمەتىنە سىلتەمە جاساپ.
None
None

«قۇرمەتتى وتانداستار!

سىزدەردى كۇللى مۇسىلمان بالاسىنىڭ ۇلىق مەرەكەسى - ورازا ايتپەن شىن جۇرەكتەن قۇتتىقتايمىن! ايت قابىل بولسىن، اعايىن!

«ايت» ءسوزى - «مەرەكەلەۋ»، «حال سۇراسۋ»، «ءبىر-ءبىرىن قۋانتۋ»، «قۋانىشقا توپتالۋ» دەگەن ماعىنالاردى بىلدىرەدى. ورازا ايت مەيرامىندا جۇرەككە مەيىرىم، قۋانىش سەزىمى ۇيالايدى. وسىناۋ ساۋلەلى ساتتە بارشاڭىزعا رياسىز نيەتپەن اللانىڭ اماندىعى مەن بەرەكەسىن تىلەيمىن. جاراتقان جانۇيالارىڭىزعا جار بولسىن!

ورازا ايت - ءبىر اي بويى ورازا ۇستاپ، ىقىلاسپەن جاقسىلىق جاساعان ادامنىڭ قۇرمەتكە، ماراپاتقا يە بولاتىن ءساتى. اللا تاعالا: «مەن پارىز ەتكەن ورازانى پەندەلەرىم وتەپ، اقىسىن الۋعا (ايت نامازىن وتەۋگە) مەشىتكە بەت الدى. ولار مەن ءۇشىن ورازا ۇستادى، مەنىڭ پارمەنىممەن اۋىز اشتى، ەندى قۋانىشقا كەنەلسىن...» دەيدى. راببىمىز بارشامىزدىڭ قۋانىشىمىزدى ارتتىرىپ، ەكى دۇنيەدە دە مەرەيىمىزدى ۇستەم ەتكەي.

اللا تاعالا ۇستاعان ورازامىزدى، مۇقتاج جاندارعا ۇلەستىرگەن زەكەتىمىز بەن ءپىتىر ساداقامىزدى، بەرگەن اۋىزاشارىمىزدى قابىل ەتىپ، مول ساۋاپ جازعاي. ساۋاپتار ەسەلەنىپ جازىلاتىن بەرەكەلى ايدا كوڭىلى جابىرقاۋ جانداردىڭ جۇرەگىنە قۋانىش سىيلاۋعا تىرىستىق. وسى رەتتە قازاقستان مۇسىلماندارى ءدىني باسقارماسىنىڭ يگى باستاماسىنا ءۇن قوسىپ، مەشىتتەرىمىزدە اتقارىلعان ىزگى ءىس-شارالارعا، قايىرىمدىلىق اكتسيالارىنا بەلسەندى تۇردە ۇلەس قوسقان بارشا جومارت جاندارعا اللانىڭ نۇرى جاۋسىن دەيمىن. ىزگى امالدارىڭىزدىڭ جاقسىلىعى مەن ساۋابى ارتا تۇسۋىنە تىلەكتەسپىن.

قادىرلى جاماعات!

ورازا ايت مەرەكەسى قۇتتى بولسىن! ءار شاڭىراققا باق پەن بەرەكە، بىرلىك پەن تاتۋلىق تىلەيمىن. اللا تاعالا بارشامىزدى كەلەسى رامازانعا دەيىن امان- ەسەن جەتكىزىپ، مول ساۋاپقا كەنەلۋدى ءناسىپ ەتكەي.

حالقىمىز امان، جۇرتىمىز تىنىش، ەڭسەلى ەلىمىزدىڭ بولاشاعى جارقىن، تاۋەلسىزدىگىمىز باياندى بولعاي! ءامين!» - دەلىنگەن قۇتتىقتاۋ ماتىنىندە.


سوڭعى جاڭالىقتار