قاراعاندى وبلىسىندا دومبىرانىڭ قۇلاعىندا وينايتىن ورىس جىگىتى تۇرادى

قاراعاندى. قازاقپارات - قاراعاندى وبلىسىنىڭ ساران قالاسىندا قازاقشا ءان شىرقاپ، كوپشىلىكتى ءتانتى ەتىپ جۇرگەن ورىس ازاماتى تۇرادى.
None
None

ۆيتالي فاليك قازاق ءانىن عانا ەمەس قازاقتىڭ قولونەرىن دە ناسيحاتتاپ ءجۇر. ۆيتالي فاليكتىڭ اكەسى ورىس اناسى كارىس. ءوزى دومبىرانى قولىنا 15 جاسىندا العان. سودان بەرى ۇلتتىق اسپاپتان ءبىر ەلى اجىراماعانىن ايتادى.

بۇگىندە قازاقتىڭ قارا دومبىراسىن سەرىك ەتكەن ورىس جىگىتى تالاي توي-دۋماننىڭ تورىنەن تابىلىپ ءجۇر.

ۆيتالي فاليك شەت اۋدانى ورتاۋ اۋىلىندا تۋىپ، وسكەن. اناسى ونى كىشكەنتايىنان تۋعان جەرىن، ەلىن قۇرمەتتەۋگە ۇيرەتكەنىن ايتادى. ول سونىمەن قاتار قازاقتىڭ قولونەرىن دە مەڭگەرىپ، كاسىبىنە اينالدىرعان. بۇگىندە ۆيتالي كوركەم ەڭبەك ءپانىنىڭ مۇعالىمى.

ساباقتا كۇندەلىكتى تۇرمىسقا قاجەتتى زاتتاردى اعاشتان ويىپ جاساپ، ونى ويۋ-ورنەكپەن ارلەيدى. دومبىرا، قوبىز ءتارىزدى ۇلتتىق اسپاپتاردى جاساۋعا قارا اعاش ۇيەڭكى تاڭدالسا، تۇرمىستىق زاتتاردى شاعىن بۇيىمداردى دايىنداۋ ءۇشىن تەرەكتى قولدانعان دۇرىس، دەيدى ول.

بىرنەشە ونەر بويىندا توعىسقان شەبەر قازىر ورتەكە جاساپ، ونى ۇلتتىق اسپاپتاردىڭ اۋەنىنە قوسىپ ءجۇر. اراسىندا قولىنا قىلقالام الىپ، سۋرەت سالاتىنى دا بار ەكەن. ايتۋىنشا، ءار تۋىندىنىڭ ءوز تاريحى بار.

«ءبىزدىڭ مەكتەپتەگى بالالار سپورتقا جاقىن. كەيدە ءان ايتىپ، دومبىرا تارتامىز دەگەندە، «جوق، ءبىز قىزداردىڭ جۇمىسىنا ارالاسپايمىز» دەيتىن. سودان ءبىر كۇنى ورتەكە جاساپ شىعاردىق. ونى دومبىرا شەرتىپ، سەكىرتىپ ويناپ كورىپ ەدى، ۇلتتىق اسپاپتى قولىنا ۇستاپ كورمەگەن بالالاردىڭ ءوزى قىزىعىپ، دومبىرا ۇيىرمەسىنە بارا باستادى»، - دەيدى ۆيتالي.

ۆيتالي فاليكتىڭ بالالارى قازاق مەكتەبىندە وقيدى. ونىڭ وتباسىنداعىلار قازاقتىڭ سالت-ءداستۇرى مەن ءجون-جورالعىسىن بەرىك ۇستانادى ەكەن.

ول كەزىندە ەكى بالاسىمەن كەلگەن جالعىزباستى اناسىن باۋىرىنا باسىپ، قولداۋىن اياماعان ورتاۋ اۋىلىنىڭ تۇرعىندارىن قاتتى قۇرمەتتەيدى. بۇگىندە ءوزى دە جەرلەستەرىنە قولدان كەلگەن كومەگىن كورسەتىپ، تاتۋ-ءتاتتى عۇمىر كەشىپ كەلەدى.

سوڭعى جاڭالىقتار