مەن قازاققا كەلىن بولاتىنىمدى وقۋشى كەزىمنەن ءبىلدىم - وزگە ۇلت وكىلى

الماتى. قازاقپارات- قازاق ازاماتىنا تۇرمىسقا شىققان جەتىسۋلىق ليۋدميلا - ناعىز قازاقتىڭ يناباتتى كەلىنى.

بارلىق سالت- ءداستۇر مەن ءتىلدى مەڭگەرگەن ول قازاقپارات تىلشىسىنە باقىتتى وتباسى بولۋدىڭ جولدارى تۋرالى ايتىپ بەردى. ساحيپوۆ اسقار مەن ميحايلوۆا ليۋدميلانىڭ وتاۋ كوتەرگەندەرىنە بيىل 16 جىل تولدى. ەكەۋى دە الماتى وبلىسى، سارقان اۋدانى، سوكولوۆكا اۋىلىنىڭ تۋماسى. ءبىر مەكتەپتە وقىدى.

«مەنىڭ ۇلتىم - ورىس، كۇيەۋىم - قازاق. ويتكەنى، شىنايى ماحابباتقا ۇلت تا، ءدىن دە، ءتىل دە كەدەرگى بولا المايدى. جولداسىم اسقار مەنەن 7 جاس ۇلكەن. مەن وعان 18 جاسىمدا تۇرمىسقا شىقتىم. ۇيلەنۋ تويىمىزدىڭ الدىندا نەكەمىزدى مۇسىلمانشا قيدىق. قۇداي جالعىز جانە بارلىق ءدىننىڭ پرينتسيپتەرى ۇقساس. سوندىقتان دىنگە كەلگەندە ەشقانداي تۇسىنىسپەۋشىلىك بولمادى. مەن قازاققا كەلىن بولاتىنىمدى وقۋشى كەزىمنەن ءبىلدىم»، - دەيدى ليۋدميلا.

ول وزىنە قازاق حالقىنىڭ سالت- ءداستۇرى مەن ادەت- عۇرپى تاڭسىق ەمەس ەكەنىن ايتتى.

«قازاقتىڭ سالت- ءداستۇرىن كىشكەنتايىمنان بىلەمىن. سەبەبى، دوستارىم، كورشىلەرىم ءبارى قازاق بولدى. قازاق وتباسىنا بىردەن ۇيرەنىپ كەتتىم. ەنەم وتە جاقسى، مەيىرىمدى، اشىق- جارقىن كىسى ەدى. بىلمەگەن دۇنيەمدى اقىلعا سالىپ، بارلىعىن سابىرمەن ۇيرەتەتىن. سول كىسىدەن ءۇي شارۋاسىن قالاي جۇرگىزۋ كەرەكتىگىن تولىق مەڭگەرىپ الدىم. ۇيدە ەكى ۇلتتىڭ دا سالت- ءداستۇرىن ۇستانامىز. ورىس حالقىنىڭ سالت- داستۇرلەرى، ىرىم- تيىمدارى مۇلدەم باسقا بولعانىمەن ءمان- ماعىناسى جاعىنان قازاق داستۇرلەرىنە ۇقساس. مىسالى، ايت مەرەكەسىندە ايت قابىل بولسىن! دەپ داستارحان دايىنداپ، ايتتاپ كەلۋشىلەردى كۇتسەك، پاسحا كەزىندە دە تاپ سولاي داستارحان جايىلادى»، - دەيدى ول.

اسقار مەن ليۋدميلانىڭ بالالارى قازاق بالاباقشاسىنا بارىپ، قازاق مەكتەبىندە ءبىلىم الىپ جاتىر.

«ءبىر ۇل، ءبىر قىزىمىز بار. ارينە، ەكى ۇلتتىڭ مەنتاليتەتى، سالت- ءداستۇرى مۇلدەم باسقا. دەگەنمەن بالا تاربيەسىنە ونىڭ كەدەرگىسى جوق. اكەسى قازاق، قانى قازاق بولعاندىقتان، بارىنشا ۇلتىنا ساي تاربيە بەرىپ جاتىرمىز. ۇيدە ءبارىمىز قازاق تىلىندە سويلەيمىز. بالالارىم قازاق مەكتەبىندە ءبىلىم الىپ جاتىر»، - دەيدى ليۋدميلا.

سونىمەن قاتار، ول باقىتتى وتباسى بولۋدىڭ جولدارى تۋرالى ايتتى.

«وتباسىنىڭ باقىتتى، بەرەكەلى بولۋى ەكى جاققا بايلانىستى. باقىتتى جانۇيا ەرلى- زايىپتىنىڭ ءبىر- ءبىرىن تۇسىنۋىنەن، قانشا قاتەلىكتەر بولسا دا كەشىرىممەن قاراۋىنان تۋىندايدى. ەگەر ەكى ادام ءبىر- ءبىرىن شىن مانىندە قۇرمەتتەسە، سىيلاسا، شىن سۇيسە، البەتتە باقىتتى بولادى. مەنىڭ ويىمشا وزگە ۇلتقا كەلىن بولساڭ دا، نە وزگە ۇلتقا كۇيەۋ بالا بولساڭ دا، ەڭ باستىسى - سىيلاستىق»، - دەيدى قازاقتىڭ كەلىنى ليۋدميلا.

اۆتور: الما مۇقانوۆا