قازاق حالقىنىڭ كوڭىلىنىڭ كەڭدىگىنىڭ ارقاسىندا باسقا ۇلت وكىلدەرى تاتۋ ءومىر ءسۇرىپ جاتىر - اسىلى وسمان

بۇل تۋرالى قازاقپارات تىلشىسىنە عالىم، قوعام قايراتكەرى، قازاقستان حالقى اسسامبلەياسىنىڭ مۇشەسى، «پاراسات» وردەنىنىڭ جانە «ءتىل جاناشىرى» قۇرمەت بەلگىسىنىڭ يەگەرى اسىلى وسمان ايتىپ بەردى. عالىمنىڭ ايتۋىنشا، قازاق حالقىنىڭ كوڭىلىنىڭ كەڭدىگى، تازا پەيىلى، دارحاندىعىنىڭ ارقاسىندا قازاق جەرىندە بۇگىندە ءبىرتالاي ۇلت وكىلدەرى تاتۋ ءتاتتى، ءبىر شاڭىراق استىندا ءومىر ءسۇرىپ كەلەدى.
«قازىرگى تاڭدا قازاقتان باسقا وزگە ۇلتتى وزىمەن تەڭ كورىپ وتىرعان باسقا قانداي قاي ەل بار الەمدە؟ ! سوندىقتان مەن بۇگىندە قازاقستانداعى ۇلتتار دوستىعى وزگە ەلدەرگە شىن مانىندە ۇلگى بولا الادى دەپ ايتا الامىن. دەگەنمەن، بارىمىزگە وسى بەرەكە- بىرلىگىمىزدى ساقتاپ، ونى ارى قاراي دامىتۋ كەرەك. ول ءۇشىن بىزگە تازا نيەت، ىقىلاس كەرەك»، - دەدى عالىم.
ءتىل جاناشىرى قازاق ءتىلىنىڭ بۇگىنگى حالىنە كوڭىلى تولمايتىنىن جاسىرعان جوق.
«شىن ايتايىن، قازاق ءتىلىنىڭ بۇگىنگى ءحالى مەنىڭ كوڭىلىمدى قۋانتپايدى. ۇلتتىڭ جانى، رۋحىنىڭ ءۇنى، ەڭ قۇندى دۇنيەسى ونىڭ ءتىلى. ءسىزدىڭ تاريحىڭىزدى، ادەبيەتىڭىزدى، مادەنيەتىڭىزدى دە ارى قاراي جالعاستىراتىن كومەيدەگى ءسوز بەنەن تاڭدايداعى ءتىل عانا. ءبىراق، سوندا دا شۇكىرشىلىك ەتەمىن. قازاق ءتىلىنىڭ اياسى كەڭەيىپ، دامىپ كەلەدى»، - دەدى ول.
سونداي- اق، اسىلى وسمان قازاقستان حالقى اسسامبلەياسى جايىنداعى ءوز ويىن جەتكىزدى.
«مەنىڭشە قازاقستان حالقى اسسامبلەياسى قازاقستاندا كەمشىن تارتىپ جاتقان دۇنيەلەردى پرەزيدەنت پەن حالىق الدىنا شىعارۋى كەرەك. سەبەبى، ول قازاقستانداعى وزگە ۇلت وكىلدەرىنىڭ باسىن قوسقان ۇيىم. بۇدان بولەك، اسسامبلەيا مۇشەلەرى قازاقتىڭ، قازاق ۇلتىنىڭ توڭىرەگىنە توپتاسۋى كەرەك»، - دەدى عالىم.
ول سونداي- اق، قازاقستاندا ارى قاراي دا ۇلتارالىق دوستىق بولۋى ءۇشىن قازاق حالقىن قادىرلەپ، سىيلاي ءبىلۋ كەرەك ەكەنىن العا تارتتى.
«ءبىز ءبارىمىز قازاق حالقىنىڭ توڭىرەگىنە توپتاسۋىمىز كەرەك، ونىڭ بويىنداعى ادامي اسىل قاسيەتتەرىن ۇعىپ، ءتۇسىنۋىمىز كەرەك، ول ءۇشىن قازاق ءتىلىن ءبىلۋىمىز كەرەك. مەن قازاق حالقىنىڭ تازالىعىنا، ادالدىعىنا ەشتەڭەنى تەڭەي المايمىن. مىنا ەلدىڭ يەسى دە، كيەسى دە قازاق.
تولە بي بابامىز: «ىدىراۋ زامان قاسيەتى، بىرىگۋ اتا- بابا وسيەتى»، - دەگەن ەكەن. ءبارىمىز وسى وسيەتتى ورىنداۋىمىز كەرەك. سونداي- اق، تولە بي: «حالقىڭا ءادىل بول، دۇشپانىڭا قاتال بول، دوسىڭا ادال بول»، - دەپ ايتقان. قازىرگى ۋاقىتتا حالىق پەن بيلىك ءبىر- ءبىرىن ءتۇسىنۋى كەرەك. سوندا ەلىمىز ارى قاراي دا دامي بەرەدى. قازاق ءتىلىن بارىنە ورتاق ءتىل ەتۋگە اتسالىسۋ كەرەك»، - دەگەن ويىن جەتكىزدى اسىلى وسمان.
قوعام قايراتكەرى قاڭتار وقيعاسى كەزىندە پرەزيدەنتتىڭ باتىل شەشىمدەرى ەل تىنىشتىعىن ساقتاۋدا ۇلكەن ءرول ويناعانىن دا اتاپ ءوتتى.
«تاۋەلسىزدىككە 30 تولعاندا، مۇنداي قاسىرەتتى كورۋ ۇلكەنگە دە، كىشىگە دە وتە اۋىر بولدى. مەملەكەت باسشىسى سول ءبىر قيىن- قىستاۋ تۇستا وتە دۇرىس شەشىم قابىلدادى. ايتپەسە، ءبىز قازىر وسىلاي وتىرار ما ەدىك، مەملەكەتىمىزدەن اجىراپ قالار ما ەدىك؟ سوندىقتان مەن پرەزيدەنتتىڭ سول كەزدەگى شەشىمىن قولدادىم ءارى ءجون سانادىم. مىسالى، ەلىمىزگە ۇجىمدىق قاۋىپسىزدىك تۋرالى شارت ۇيىمىنىڭ (ۇ ق ش ۇ) اسكەرى كەلىپ، ءبىزدىڭ ماڭىزدى نىساندارىمىزدى قورعادى. جالپى، توقايەۆ قيىن ساتتە حالقىمەن بىرگە بولاتىنىن كورسەتتى. سول كەزدە: «مەن ەلوردادان ەشقايدا كەتپەيمىن»، - دەدى. ال ول كەزدە شىنىمەن دە قورقىنىشتى بولدى عوي. سونداي- اق ول پرەزيدەنت بولعان كۇننەن باستاپ، قوعامدا ادىلدىكتىڭ ورناۋىنا كوڭىل ءبولىپ كەلەدى. ال ادىلدىك پەن شىندىققا ەش نارسە جەتپەيدى. سوندىقتان مەن مەملەكەت باسشىسى قاسىم- جومارت توقايەۆتىڭ ساياساتىن قولدايمىن»، - دەپ ءوز ويىن ءبىلدىردى قازاقستان حالقى اسسامبلەياسىنىڭ مۇشەسى اسىلى وسمان.
اۆتور: دۋمان ارعىنگەلدى