ەلوردادا كوپقاباتتى ۇيگە قۇلاپ كەتكەن كراننىڭ يەسىنە ايىپپۇل سالىندى
«الەۋمەتتىك جەلىگە مونيتورينگ جۇرگىزۋ بارىسىندا نۇر-سۇلتان قالاسى ەسىل اۋدانى ۇلى دالا داڭعىلى مەن قابانباي باتىر داڭعىلىنىڭ قيىلىسىندا ورنالاسقان باس مەردىگەرى «Bazis Construction» ج ش س سانالاتىن قۇرىلىس نىسانىندا اۆتوكراننىڭ ونەركاسىپتىك قاۋىپسىزدىك قاعيدالارىن بۇزعانى تۋرالى بەينەروليك انىقتالدى»، - دەگەن جاۋاپ كەلدى توتەنشە جاعدايلار مينيسترلىگى ونەركاسىپتىك قاۋىپسىزدىك كوميتەتىنەن.
حابارلامادا ايتىلعانداي، قالالىق ونەركاسىپتىك قاۋىپسىزدىك دەپارتامەنتىنىڭ ينسپەكتورلارى وقيعا ورنىنا بارىپ، بولعان جاعدايدىڭ ءمان-جايىن تەكسەرگەن.
«اۆتوموبيل كرانىنىڭ وپەراتورى (XZJ5281JQZ50K) قاۋىپسىزدىك تەحنيكاسىن بۇزىپ، وبەكتىنىڭ قىزىل سىزىعىنىڭ اۋماعىنان تىس جۇك تاسىمالداعانى انىقتالدى. مەملەكەتتىك ينسپەكتورلار اۆتوموبيل كرانىنىڭ مەنشىك يەسى «باس تەحنيكا» ج ك يەسىنە تۇسىندىرمە جۇمىسىن جۇرگىزدى.
سونىمەن قاتار قاۋىپسىز جۇمىس ىستەۋ قاعيداسىن بۇزعانى ءۇشىن ق ر ا ق ب ت ك 298-بابىنىڭ 1-بولىگى بويىنشا مەردىگەرگە ايىپپۇل سالىنىپ، اكىمشىلىك جازاعا تارتىلدى»، - دەيدى اتالعان ۆەدومستۆودان.
ەسكە سالا كەتەيىك، كەشە نۇر-سۇلتان قالاسىنىڭ سىعاناق كوشەسىندە ورنالاسقان تۇرعىن ءۇيدىڭ التىنشى قاباتىنداعى پاتەردىڭ تەرەزەسىنە اۆتوكران قۇلادى. سونداي-اق، قالا اكىمدىگى بولعان جايتقا تۇسىنىك بەرىپ، كرانى كوپقاباتتى ۇيگە قۇلاپ كەتكەن مەردىگەردىڭ جازالاناتىنىن حابارلادى.
