كوپ سپورتشى دوپينگتى ادەيى ەمەس، بىلمەگەندىكتەن قابىلداۋى مۇمكىن - كوميتەت

بۇل پىكىردى ق ر مادەنيەت جانە سپورت مينيسترلىگى سپورت جانە دەنە شىنىقتىرۋ كوميتەتى ءتوراعاسىنىڭ ورىنباسارى ايگۇل بەكتەنوۆا العا تارتىپ وتىر، دەپ حابارلايدى قازاقپارات ءتىلشىسى.
«ەلىمىزدە سپورت سالاسىندا دوپينگكە مۇلدەم توزبەۋشىلىك ساياساتى جۇرەتىنىن ەسكە سالعىم كەلەدى. 2019-جىلى ءبىز دوپينگپەن كۇرەسۋ ماقساتىندا ارنايى زاڭ قابىلداپ، جاۋاپكەرشىلىك قاتاڭدادى. اتالعان زاڭدا 2 نورماتيۆ بار. ءبىرىنشى، ول سپورتشىنىڭ دوپينگ ەرەجەسىن بۇزۋ نورماتيۆى، ەكىنشىسى - دوپينگ انىقتالعان جاعدايدا سپورتشىنىڭ جارىستا كورسەتكەن ناتيجەسى مەن جەتىستىگىن جوققا شىعارۋ»، - دەدى ايگۇل بەكتەنوۆا ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا.
مينيسترلىك وكىلىنىڭ مالىمدەۋىنشە، جارىستا جەڭىسكە جەتكەن سپورتشىدان دوپينگ قولدانعانى انىقتالسا، ول بەرىلگەن سىي-سىياپات پەن اتاق-دارەجەنى كەرى قايتارادى.
«جەڭىسكە جەتكەن سپورتشىعا مەدالدان بولەك، چەمپيوندىق تيتۋل، قارجىلاي جانە مۇلىكتەي سىياقى بەرىلەدى. ەگەر كەيىن سپورتشى دوپينگ داۋىنا ۇشىراپ، ول دالەلدەنسە، جوعارى اتالعان سىي-قۇرمەتتى كەرى قايتارۋعا مىندەتتى. وسىلايشا، ءبىز دوپينگ داۋىنىڭ الدىن الىپ وتىرمىز. سونىمەن قاتار، ەلىمىزدە دوپينگكە قارسى ۇلتتىق ورتالىق جۇمىس ىستەيدى. ول جەردە سپورتشىلاردى دوپينگكە قارسى تەستىلەۋدەن وتكىزىپ قانا قويماي، سپورشىلار مەن جاتتىقتىرۋشىلار اراسىندا ونىڭ الدىن الۋعا قاتىستى ارنايى ءدارىس، سەمينارلار وتكىزىلەدى. سەبەبى كوپتەگەن سپورتشى دوپينگتى ادەيى ەمەس، بىلمەگەندىكتەن قابىلداۋى مۇمكىن. ويتكەنى، كەيبىر تىيىم سالىنباعان پرەپاراتتار قۇرامىندا دوپينگتىڭ ەلەمەنتى بولۋى ىقتيمال»، - دەيدى ول.
ايتا كەتەيىك، بۇعان دەيىن كوميتەت باسشىسى ەل وڭىرلەرىندە سپورت قۇرامالارىنىڭ دايىندىعى بەي-بەرەكەت ءجۇرىپ جاتقانىن ايتتى.