تبيليسيدە ابايعا ەسكەرتكىش ورناتىلدى

اتالعان ءىس- شارا قازاقستان مەن گرۋزيا اراسىنداعى ديپلوماتيالىق قارىم- قاتىناستاردىڭ ورناعانىنا 30 جىل تولۋىنا وراي ۇيىمداستىرىلدى.
«بۇل ەكى ەل اراسىنداعى دوستىعىمىزدىڭ تاعى ءبىر نىشانى بولارى ءسوزسىز. اباي مۇراسى تەك ءبىزدىڭ ەلىمىز ءۇشىن عانا ەمەس، بۇكىل ادامزات ءۇشىن زور قۇندىلىق بولىپ تابىلادى. 2020 -جىلى ءبىز ۇلى ابايدىڭ 175 جىلدىق مەرەيتويىن اتاپ وتتىك. كورسەتىلگەن وسىناۋ قۇرمەت ءۇشىن گرۋزيا ۇكىمەتى مەن حالقىنا العىس ايتامىن»، - دەدى قايىربەك وسكەنبايەۆ.
تبيليسيگە جۇمىس ساپارىمەن بارعان مينيستر گرۋزيانىڭ ۆيتسە- پرەمەرى، ەكونوميكا جانە تۇراقتى دامۋ ءمينيسترى ليەۆان داۆيتاشۆيليمەن كەزدەستى. كەلىسسوزدەر بارىسىندا كولىك، اقپاراتتىق تەحنولوگيالار جانە يننوۆاتسيالار سالاسىنداعى ساۋدا- ەكونوميكالىق ىنتىماقتاستىقتى دامىتۋ پەرسپەكتيۆالارى سياقتى ماڭىزدى ماسەلەلەر قوزعالدى.
قايىربەك وسكەنبايەۆتىڭ ايتۋىنشا، قازاقستان مەن گرۋزيا اراسىنداعى ساۋدا قاتىناستارىن ۇلعايتۋدا ايتارلىقتاي الەۋەت بايقالادى. مينيستر بۇگىنگى تاڭدا قازاقستاندىق كومپانيالار مەتاللۋرگيا، مۇناي- حيميا، تاماق جانە ماشينا جاساۋ سالالارىندا وڭدەلگەن تاۋارلارىنىڭ گرۋزياعا ەكسپورتىن ارتتىرۋعا دايىن ەكەنىن اتاپ ءوتتى.
ولاردىڭ قاتارىندا فارماتسيەۆتيكا مەن قۇرىلىس سالاسى دا بار. سونداي- اق، مينيستر گرۋزيانىڭ قورعانىس ءمينيسترى بۋرچۋلادزە دجۋانشەرمەن كەزدەسىپ، ساۋدا- ەكونوميكالىق ىنتىماقتاستىق جونىندەگى ۇكىمەتارالىق كوميسسيا وتىرىسىنىڭ جۇمىسىنا قاتىسۋدى جوسپارلاپ وتىر. ايتا كەتەيىك، بۇعان دەيىن قازاقستان گرۋزياعا مۇناي ونىمدەرى مەن گازدى از، ال بولات پروكاتىن كوپ ەكسپورتتاي باستاعانى تۋرالى جازىلعان.