پرەزيدەنت ۇلتتىق قۇرىلتايدىڭ قۇرامىنا كىمدەر كىرەتىنىن ايتتى

نۇر-سۇلتان. قازاقپارات - ق ر پرەزيدەنتى قاسىم-جومارت توقايەۆ ءبىر ايدان كەيىن العاشقى وتىرىسى وتەتىن «ۇلتتىق قۇرىلتايدىڭ» قۇرامىنا كىمدەر كىرەتىنىن ايتتى، دەپ حابارلايدى قازاقپارات ءتىلشىسى.

«قۇرىلتاي جالپىۇلتتىق ديالوگتىڭ امبەباپ مودەلىنە اينالادى. قۇرىلتاي قۇرامىنا دەپۋتاتتار، اسسامبلەيا مۇشەلەرى، ساراپشىلار مەن قۇقىق قورعاۋشىلار، بارلىق وڭىرلەردىڭ، سونداي-اق ازاماتتىق اليانستىڭ، قوعامدىق كەڭەستەردىڭ، ۇكىمەتتىك ەمەس ۇيىمداردىڭ، بيزنەس-قاۋىمداستىقتاردىڭ جانە ءوندىرىس سالاسىنىڭ وكىلدەرى كىرەدى»، - دەدى مەملەكەت باسشىسى قازاقستان حالقى اسسامبلەياسىنىڭ 31-سەسسياسىندا.

پرەزيدەنتتىڭ پايىمىنشا، قازاقستان حالقى اسسامبلەياسى وسى مۇمكىندىكتى بىرلىك پەن كەلىسىمدى نىعايتۋ جولىندا تولىعىمەن پايدالانۋى كەرەك.

«اسسامبلەيا ۇلتتىق قۇرىلتايمەن بىرلەسىپ، ءتيىمدى جۇمىس ىستەۋى كەرەك. سەبەبى، تۇپتەپ كەلگەندە، ەكەۋىنىڭ ماقساتى - ورتاق. اۋقىمدى وزگەرىستەرگە جاستاردىڭ دا بەلسەنە قاتىسقانى ابزال. كەشە تۇڭعىش رەت قازاقستان حالقى اسسامبلەياسىنىڭ جاستار سەسسياسى ءوتتى. ونىڭ ۇسىنىمدارىن مۇقيات زەردەلەۋ قاجەت»، - دەدى قاسىم-جومارت توقايەۆ.

ايتا كەتەيىك، اسسامبلەيانىڭ بۇل جولعى جيىنى «ەل بىرلىگى - جاڭارعان قازاقستاننىڭ تىرەگى» كۇن تارتىبىمەن وتەدى.

اۆتور: ەسىمجان ناقتىباي