قازاقستان حالقى بىرلىكتە ءومىر ءسۇرۋدىڭ ءمان-ماڭىزىن جاقسى تۇسىنەدى - گاۋحار ارىستان قىزى

نۇر-سۇلتان. قازاقپارات - قازاقستان حالقى بىرلىك پەن ىنتىماقتا ءومىر ءسۇرۋدىڭ ءمان-ماڭىزىن جاقسى تۇسىنەدى.
None
None

بۇل تۋرالى «ءتىل - تۇتاستىق تۇعىرى» اتتى رۋحاني-تاعىلىمدى كەشتە ەلوردا اكىمدىگى تىلدەردى دامىتۋ جانە ارحيۆ ءىسى باسقارماسىنىڭ باس مامانى گاۋحار ارىستان قىزى ايتتى، دەپ حابارلايدى قازاقپارات ءتىلشىسى.

«قازاقستان حالقىنىڭ بىرلىگى كۇنى مەرەكەسىنە وراي وسىنداي ماڭىزدى ءىس-شارانى ۇيىمداستىردىق. اتاپ ايتقاندا، بىرلىكتە، ىنتىماقتا ءارى تاتۋلىقتا ءومىر ءسۇرۋدىڭ ءمان-ماڭىزىن بارشامىز جاقسى تۇسىنەمىز. ەلىمىزدە ادامداردى ۇلتىنا، ۇلىسىنا، دىلىنە، دىنىنە، تىلىنە بولمەي، بارىنە قۇشاعىن ايقارا اشىپ، كىم كەلسە دە باۋىرىم دەپ قارسى الادى. سوندىقتان قازاق ەلىنىڭ بىرلىگى مەن ىنتىماعى نىعايا بەرسىن، كوك تۋىمىز كوگىمىزدە ماڭگى جەلبىرەسىن. ەڭ باستىسى، قازاقستان دەگەندە قازاق ەلى ەكەنىن بىلدىرەتىن - مەملەكەتتىك ءتىلىمىز. وسى ورايدا بۇل كەشتى ۇيىمداستىرۋداعى ماقسات - قازاقستان حالقىنىڭ ىنتىماعىن، بىرلىگىن ناسيحاتتاۋ، بارلىق ۇلتتىڭ وكىلىنىڭ قاتىناس ءتىلى رەتىندە مەملەكەتتىك ءتىلدىڭ ءرولىن كۇشەيتۋ»، - دەدى گ. ارىستان قىزى.

اتاپ ايتقاندا، 1- مامىر - قازاقستان حالقىنىڭ بىرلىگى كۇنى قارساڭىندا نۇر-سۇلتان قالاسىنىڭ تىلدەردى دامىتۋ جانە ارحيۆ ءىسى باسقارماسى «ءتىل - تۇتاستىق تۇعىرى» اتتى رۋحاني-تاعىلىمدى كەش وتكىزدى. مادەني شارادا «قورقىت» ەتنوانسامبلى، ق. قۋانىشبايەۆ اتىنداعى مەملەكەتتىك اكادەميالىق قازاق مۋزىكالىق دراما تەاترىنىڭ ارتىستەرى، انشىلەر التىناي جورابايەۆا، قۇرماش ماقان، گۇلسىم مىرزابەكوۆا، سابىر گۋسەينوۆ، ءمادي سىزدىق ونەر كورسەتتى.

سونداي-اق اسسامبلەيا قۇرامىنداعى ەتنوس وكىلدەرى دە اتسالىستى.

ەل بىرلىگى، ىنتىماقتاسۋ جايلى ارنايى دايىندالعان بەينەروليكتەر كورسەتىلىپ، ەتنوسارالىق قارىم-قاتىناس ساياساتى جايلى اقپارات بەرىلەدى.

بۇل مەرەكە 1996-جىلدان باستاپ اتاپ وتىلەدى. دوستىق پەن ءوزارا تۇسىنىستىكتىڭ نىشانى بولعان بۇل مەيرام - قازاقستان قوعامىنداعى بىرىكتىرۋشى فاكتورلاردىڭ ءبىرى. سول تۇرعىدان العاندا 1- مامىر مەرەكەسى ەلىمىزدە ۇلتتار مەن ۇلىستاردىڭ دوستىعى مەن تاتۋلىعىنىڭ، ازاماتتىق كەلىسىمنىڭ، اۋىزبىرلىگىنىڭ جارقىن كورىنىسىن پاش ەتەدى.

سوڭعى جاڭالىقتار