قازاق سىنىبىندا وقيتىن وقۋشىلاردىڭ سانى اسا ءوسىپ جاتقان جوق - اسحات ايماعامبەتوۆ

نۇر- سۇلتان. قازاقپارات - ەلىمىزدە بالاباقشاداعى بۇلدىرشىندەردىڭ 76 پايىزى مەملەكەتتىك تىلدە ءتالىم- تاربيە الىپ جاتىر.
None
None

بۇل تۋرالى ق ر ءبىلىم جانە عىلىم ءمينيسترى اسحات ايماعامبەتوۆ ءمالىم ەتتى، دەپ حابارلايدى قازاقپارات ءتىلشىسى.

«ءتىلدى دامىتۋ ماسەلەسى ءبىزدىڭ مينيسترلىككە بەرىلگەنىنە 1 جىل بولىپ قالدى. ونىڭ بىزگە كوشىرىلگەنى زاڭدى دەپ ويلايمىن. وسى ۋاقىت ىشىندە اتالعان سالادا اۋقىمدى پروبلەمانىڭ بارىنا كوزىمىز جەتتى. ءيا، ماسەلە بار، ءبىراق اتقارىلىپ جاتقان جۇمىس تا از ەمەس. مەملەكەتتىك ءتىلدى دامىتۋ جولىندا بىرنەشە باعىتتا جۇمىس ىستەلىنىپ جاتىر. اتاپ ايتقاندا، الدىمەن قازاق تىلىندە ءبىلىم بەرەتىن مەكتەپتەردىڭ سانىن ارتتىرۋعا كۇش سالىپ جاتىرمىز. بۇگىندە ەلىمىزدەگى بالاباقشالاردىڭ 76 پايىزى قازاق تىلىندە ءتالىم بەرەدى، مەكتەپتەردىڭ 67 پايىزى، ال كوللەدجدەر مەن ۋنيۆەرسيتەتتەردىڭ 64-66 پايىزى مەملەكەتتىك تىلدە ءبىلىم بەرىپ جاتىر»، - دەدى اسحات ايماعامبەتوۆ «مەملەكەتتىك ءتىلدى عىلىم تىلىنە اينالدىرۋ» اتتى دوڭگەلەك ۇستەلدە سويلەگەن سوزىندە.

ءمينيستردىڭ ايتۋىنشا، ەلىمىزدە اتا- انانى بالاسىن قازاق تىلىندەگى بالاباقشا نەمەسە مەكتەپكە بەرۋگە مىندەتتەۋ جوق.

«سوڭعى جىلدارى مەكتەپتە قازاق سىنىبىندا وقيتىن وقۋشىلاردىڭ سانى اسا ءوسىپ جاتقان جوق. سوندىقتان وسى باعىتتاعى جۇمىسقا نازار سالعان ءجون. ءبىز بالالاردى مەملەكەتتىك تىلدەگى ءبىلىم ۇياسىنا ىنتالاندىرۋ، ناسيحاتتاۋ ارقىلى تارتۋىمىز كەرەك. ماجبۇرلەۋگە بولمايدى. ياعني، قازاق تىلىندە وقۋدىڭ قانشالىقتى پايدالى ەكەنىنە، ونىڭ ناتيجەسىنە كوز جەتكىزۋ ارقىلى دارىپتەۋىمىز كەرەك»، - دەيدى ول.

ايتا كەتەيىك، بۇگىن ەلوردادا «مەملەكەتتىك ءتىلدى عىلىم تىلىنە اينالدىرۋ» ماسەلەسىنە ارنالعان دوڭگەلەك ۇستەل ءوتتى. اتالعان شاراعا ءتىل جاناشىرلارىمەن قاتار سالا ماماندارى قاتىستى.

سوڭعى جاڭالىقتار