ەلوردادا جالعان پاتەردى جالعا بەرگەن الاياق ۇستالدى

سوتقا دەيىنگى تەرگەۋ بارىسىندا كۇدىكتىگە الاياقتىقتىڭ 11 ەپيزودى بويىنشا كىنا تاعىلىپ، دالەلدەنگەن. جابىرلەنۋشىلەرگە كەلتىرىلگەن ماتەريالدىق زالال شامامەن 1 ميلليون تەڭگەگە باعالانادى.
«تۇركىستان وبلىسىنىڭ 28 جاستاعى تۇرعىنى بىرنەشە اي بويى ەلورداداعى پاتەرلەردى جالعا بەرۋ تۋرالى جالعان حابارلاندىرۋلار ورنالاستىرعانى انىقتالدى. جارنامالاردا ول نارىقتىق باعادان تومەن باعا قويعان جانە اسىعىس ەكەنىن، پاتەر جالداعىسى كەلەتىندەردىڭ كوپتىگىن سىلتاۋراتىپ الدىن- الا تولەمدى تالاپ ەتكەن. ونى ۇيالى اۋدارىم ارقىلى العان. ماسەلەن، بىلتىرعى قاراشا ايىندا Krisha KZ قوسىمشاسى ارقىلى جالعان حابارلاندىرۋ جاريالاپ، قابانباي باتىر داڭعىلى مەكەنجايى بويىنشا پاتەردى جالعا بەرۋ سىلتاۋىمەن ەلوردا تۇرعىنىن الداپ، 110 مىڭ تەڭگە كولەمىندە قاراجاتىن يەمدەنگەن»، - دەپ جازدى قالالىق پوليتسيا دەپارتامەنتىنىڭ باسپا ءسوز قىزمەتى.
كۇدىكتى قاماۋعا الىندى، ق ك 190-بابى 2-بولىگى (الاياقتىق) بويىنشا تەرگەۋ جۇرگىزىلۋدە. قازىرگى ۋاقىتتا قالعان جابىرلەنۋشىلەر انىقتالۋدا.