كوروناۆيرۋستىڭ مۋتاتسياعا ۇشىراپ جاتقانى الاڭداتادى - ايجان ەسماعامبەتوۆا

بۇل تۋرالى سەناتتىڭ جالپى وتىرىسىنان كەيىن تىلشىلەرگە سۇحبات بەرگەن ق ر دەنساۋلىق ساقتاۋ ۆيتسە-ءمينيسترى - باس مەملەكەتتىك سانيتارلىق دارىگەرى ايجان ەسماعامبەتوۆا ءمالىم ەتتى، دەپ حابارلايدى قازاقپارات ءتىلشىسى.
«كوروناۆيرۋسقا توقتالساق، بۇل ماسەلەدەگى قاۋىپسىزدىك ادامداردىڭ وزىنە بايلانىستى. بىزگە ۇجىمدىق يممۋنيتەتتتى ساقتاپ قالۋ كەرەك. ول ءۇشىن ۆاكسينا سالدىرعان دۇرىس نەمەسە راۆاكسيناتسيا جاساۋ ماڭىزدى. اتاپ ايتقاندا، كوروناۆيرۋس ينفەكسياسىنىڭ تارالۋى جايىندا ءدال ءقازىر ەشبىر مامان ناقتى پايىمىن ايتا المايدى»، - دەدى ا. ەسماعامبەتوۆا.
وسى ورايدا ول ينفەكسيانىڭ تارالۋى احۋالىنا بايلانىستى ەكى سەناري بار ەكەنىن ايتتى.
«ياعني كوروناۆيرۋس مۋتاتسياعا ۇشىراپ جاتقانىن كورىپ تۇرمىز. دەگەنمەن ۆيرۋس قۇرامى مەن ونىڭ پاتوگەندىگىنىڭ تومەندەۋى جاقسى نىشان. الايدا ۆيرۋستىڭ ءالى دە مۋتاتسياعا ۇشىراپ جاتقانى ءبىزدى الاڭداتىپ وتىر. بۇل ءوز كەزەگىندە ۆيرۋستى ءبىرجولا جەڭدىك دەپ سەنىمدى تۇردە ايتۋعا مۇمكىندىك بەرمەيدى»، - دەدى باس مەملەكەتتىك سانيتارلىق دارىگەر.
بۇدان بۇرىن حابارلانعانداي، قازاقستاننىڭ دەنساۋلىق ساقتاۋ مينيسترلىگى رەسەيمەن ارادا كوروناۆيرۋستان ۆاكسينا پاسپورتتارىن ءوزارا تانۋ تۋرالى كەلىسىمدى بەكىتۋدى قولداپ وتىر.
اۆتور: رۋسلان عابباسوۆ