اجار عينيات قازاقستانداعى انا ءولىمىنىڭ ارتۋى نەمەن بايلانىستى بولعانىن ايتتى

ق ر دەنساۋلىق ساقتاۋ ءمينيسترى اجار عينيات مۇنى كوروناۆيرۋس ينفەكسياسىنىڭ ەكپىنى قايتقانىمەن بايلانىستىرىپ وتىر، دەپ حابارلايدى قازاقپارات ءتىلشىسى.
«كوروناۆيرۋس ينفەكتسياسىنان جۇكتى ايەلدەر كوز جۇمعان بولاتىن. ويتكەنى جۇكتى ايەلدەردە كوروناۆيرۋس اۋىر وتكەن ەدى. ولاردىڭ فيزيولوگيالىق جاعدايى دا اۋرۋدىڭ كەڭ تارالىپ، جىلدام اسقىنۋىنا سەبەپ بولعانىن ءتۇسىنىپ وتىرسىزدار»، - دەدى اجار عينيات سەنات وتىرىسىنان كەيىن وتكەن بريفينگىدە.
ايتۋىنشا، پاندەميا كەزىندە انا ءولىمى الەم بويىنشا 3-4 ەسە ارتقان. دۇنيەجۇزىلىك دەنساۋلىق ساقتاۋ ۇيىمىنىڭ دەرەگىن كەلتىرگەن مينيستر پاندەمياعا دەيىن انا ءولىمى وتە از تىركەلەتىن ەلدەردىڭ وزىندە بۇل كورسەتكىش 3-4 ەسە وسكەنىن اتادى. ياعني، جالپى الەمدە انا ءولىمىنىڭ ارتۋى كوروناۆيرۋسپەن بايلانىستى.
«بۇل ۆيرۋس بولعاندىقتان بالاسىڭ با، جاسسىڭ با، كارىسىڭ بە، جۇكتى اناسىڭ با - قارامادى. جاپ-جاس، دەنى ساۋ ادامدار دا كوز جۇمىپ جاتتى. ال جۇكتى ايەلدەردىڭ فيزيولوگيالىق جاعدايى ينفەكتسيانىڭ تەز دامۋىنا ىقپال ەتىپ، قايعىلى جاعدايلاردىڭ كوبەيۋىنە سەبەپشى بولدى. دۇنيەجۇزىلىك دەنساۋلىق ساقتاۋ ۇيىمى جۇرگىزگەن بارلىق تالداۋلار الەمدە، سونىڭ ىشىندە قازاقستاندا دا بۇل كورسەتكىش بىلتىر وسكەنىن كورسەتەدى. قاڭتار ايىندا كوروناۆيرۋس ينفەكتسياسىنىڭ بەسىنشى تولقىنى بولعانىنا قاراماستان، ءبىرىنشى توقساندا بۇل كورسەتكىش كۇرت تومەندەدى. انا ءولىمىنىڭ ءوسۋى كوروناۆيرۋس ينفەكسياسىمەن بايلانىستى»، - دەدى مينيستر. اجار عينيات بيىل ءبىرىنشى توقساندا قازاقستاندا انا ءولىمى كۇرت ازايعانىن اتاپ ءوتتى.
«ءبىرىنشى توقساندا اتىراۋ، پاۆلودار سياقتى انا ءولىمىنىڭ كورسەتكىشى جوعارى وبلىستاردا قايعىلى جايتتار تىركەلدى. جالپى بۇل قايعىلى وقيعالار بوساندىرۋعا قاجەت جاڭا نەمەسە قىمبات تەحنيكانىڭ بولماۋىمەن بايلانىستى ەمەس. ءولىمنىڭ نەگىزگى سەبەپتەرىنىڭ ءبىرى حالىقتىڭ دەنساۋلىعىنا جانە پەريناتالدىق ورتالىقتاردا نەمەسە پەرزەنتحانالاردا ۋاقتىلى كومەك الۋعا نەمقۇرايلى قارايتىنىمەن بايلانىستى. جىل سايىن ماقساتتى ترانسفەرتتەر ارقىلى، رەسپۋبليكالىق بيۋدجەت ارقىلى ءاربىر وڭىرگە بەلگىلى ءبىر اقشا بولىنەدى. بيىل مەديتسينالىق جابدىقتاردى ساتىپ الۋعا 50 ميلليارد تەڭگە جوسپارلانعان. ونىڭ ىشىندە ءبىز بوساناتىن ايەلدەرگە جانە بالالار ۇيىمدارىنا باسىمدىق بەرەمىز»، - دەدى اجار عينيات.
ونىڭ مالىمەتىنشە، سوڭعى ەكى جىلدا پەرزەنتحانالار مەن پەريناتالدىق ورتالىقتاردىڭ جابدىقتالۋى %80-90 عا جەتكەن.
«وڭىرلەر بۇل باعىتتا جۇمىس ىستەپ جاتىر. ءبىراق تەحنيكانىڭ اتى - تەحنيكا. تاۋلىگىنە 24 ساعات جۇمىس ىستەيتىن اپپاراتتار، ۋلترادىبىستىق زەرتتەۋ اپپاراتتارى جىل سايىن جاڭارتۋدى قاجەت ەتەدى» - دەدى مينيستر.
ايتا كەتەيىك، بۇگىن سەناتتىڭ جالپى وتىرىسىندا «قازاقستان رەسپۋبليكاسىنىڭ بيولوگيالىق قاۋىپسىزدىگى تۋرالى» قازاقستان زاڭى قابىلداندى.
اۆتور: ەسىمجان ناقتىباي