ش ق و اكىمى اباي وبلىسىندا مەملەكەتتىك مەكەمەلەردى ورنالاستىرۋ تۋرالى ايتتى

ش ق و اكىمدىگىنىڭ مالىمەتىنە سۇيەنسەك، بۇگىندە شىعىس قازاقستان مەن اباي وبلىستارىنىڭ اكىمشىلىك- اۋماقتىق شەكارالارى بەكىتىلگەن. جاڭادان قۇرىلاتىن اباي ءوڭىرىنىڭ رەسۋرستارى مەن بيۋدجەتى بويىنشا جوسپار تولىق دايىن.
«باسقارمالار مەن مەملەكەتتىك ۆەدومستۆولاردى ورنالاستىرۋدا ەش قيىندىق جوق. سەمەي قالاسىنىڭ كوممۋنالدىق مەنشىگىندە 13 مىڭ شارشى مەتردەن استام جەر بار. تاعى 37 مىڭ شارتى مەتردى بيزنەس وكىلدەرى ۇسىنۋعا دايىن»، - دەدى دانيال احمەتوۆ.
ونىڭ ايتۋىنشا، سەمەي قالاسىن دامىتۋدىڭ الداعى بەس جىلعا ارنالعان كەشەندى جوسپارى ازىرلەنگەن. بۇل ماقساتتا 260 ميلليارد تەڭگە ءبولىندى.
«اباي وبلىسىنىڭ قاراماعىندا ەكى ءىرى كاسىپورىن - اقتوعاي جانە باقىرشىق تاۋ- كەن ءوندىرۋ كاسىپورنى بولادى. ءۇرجار اۋدانىندا اگروسەكتور الەۋەتى جاقسى. بۇل بولاشاق ايماق بيۋدجەتى ءۇشىن جاقسى كىرىس ەكەنى ءسوزسىز»، - دەدى دانيال احمەتوۆ.
ەستەرىڭىزگە سالا كەتسەك، وسىعان دەيىن الەۋمەتتىك جەلىلەردە جاڭادان قۇرىلاتىن اباي وبلىسىنىڭ ورتالىعىنا اينالاتىن سەمەيدەگى گەودەزيا جانە كارتوگرافيا كوللەدجىنىڭ عيماراتى قۇقىق قورعاۋ ورگاندارىنا بەرىلەتىندىگى جايلى حابار تاراپ، كوپتىڭ نارازىلىعىن تۋدىرعانىن حابارلاعان ەدىك.
اۆتور: تالعاتجان مۇحامەتبەك ۇلى