مەن قازاقپىن - قازاقستاننىڭ ءبىرىنشى راكەتكاسى الەكساندر بۋبليك

چەمپيونات سايتى ءمالىم ەتكەنىندەي، ا. بۋبليك وزىندە رەسەيلىك ءتولقۇجاتتىڭ جوق ەكەندىگىن جەتكىزدى.
«قوس ازاماتتىققا جول بەرىلمەيتىندىكتەن، مەندە رەسەيلىك ءتولقۇجات جوق. مەنىڭ رەسەي تەننيس فەدەراتسياسىمەن ەشقانداي بايلانىسىم جوق. مەن قازاقپىن، التى جىلداي ۋاقىت بويى ەلىمنىڭ نامىسىن قورعاپ كەلەمىن. مەن دەۆيس كۋبوگىندا، ازيا جانە وليمپيادا ويىندارىندا قازاقستان اتىنان شىعاتىنىمدى ماقتان ەتەمىن»، دەدى الەكساندر بۋبليك.
قازاقستاندىق تەننيسشى ۇلى بريتانيا لاۋن- تەننيس قاۋىمداستىعىنىڭ (LTA) رەسەيلىك جانە بەلارۋس ويىنشىلارىنىڭ ۋيمبلدون-2022 جانە ءوزى وتكىزەتىن باسقا تۋرنيرلەرگە قاتىسۋىنا تىيىم سالعان شەشىمى جونىندە پىكىر ءبىلدىردى.
«مەن بۇل شەشىمنىڭ دۇرىس نە بۇرىس ەكەندىگىنە تورەلىك ايتقىم كەلمەيدى، ءبىراق وسى بويىنشا ءوز پىكىرىمدى بىلدىرەيىن. بۇل - ۇلى بريتانيا ۇكىمەتى مەن ۇيىمداستىرۋشىلاردىڭ شەشىمى. بۇعان ولاردىڭ قۇقىعى بار. مەن ءۇشىن سپورتتىڭ ناقتى ومىردەگى ورنى بولەك بولعاندىقتان، مەنىڭشە، سپورتتى تىم ساياسيلاندىرماۋ كەرەك. سپورت تەلەديدار الدىندا تاماشالاپ، سۇيىكتى ويىنشىڭا نەمەسە كومانداڭا جانكۇيەر بولۋ ءۇشىن قاجەت. وسى مۇمكىندىكتى شەكتەگەنى ءۇشىن فاناتتارعا وبال»، دەدى ا. بۋبليك.
ەسكە سالا كەتەيىك، بۇدان بۇرىن تەننيستەن قازاقستان جاسوسپىرىمدەر قۇراماسىنىڭ گونكونگپەن وينايتىنىن، قازاقستاندىق تەننيسشىنىڭ ميۋنحەندە وليمپيادا چەمپيوندارىن ۇتقانىن جازعان بولاتىنبىز. سونداي-اق قازاقستاندىق تەننيسشى پورتۋگالياداعى تۋرنيردىڭ شيرەك فينالىنا شىقتى.
اۆتور: ەلجان ەرالى