دەپۋتات الماتى حالىقارالىق اۋەجايىنا دىنمۇحامەد قونايەۆتىڭ اتىن بەرۋدى ۇسىندى
«ۇكىمەتكە ەلدىڭ نۇر- سۇلتان، الماتى سياقتى ءىرى قالالارىندا ىعى- جىعى قۇرىلىستارعا زاڭناما دەڭگەيىندە تىيىم سالۋ قاجەت. احۋال شەكتەن شىعىپ بارادى، جەرگىلىكتى اكىمدىكتەر جاعدايدى يگەرە الماي وتىر. كەي جاعدايدا ءوز ارەكەتىمەن احۋالدى ۋشىقتىرۋدا. اكىمدىكتەر مەن قۇرىلىسشىلاردىڭ شەشىمدى ىلعي كۋلۋاردا شەشۋى قالا تۇرعىندارىنىڭ ادىلەتتى نارازىلىعىن تۋعىزىپ، وزدەرىن جايسىز سەزىنۋگە سەبەپكەر بولدى. پرەزيدەنتتىڭ تاپسىرماسىنا قاراماستان، الماتىدا بۇل ماسەلە شەشىلىپ جاتقان جوق. الماتى قالاسى اكىمدىگىنىڭ قازىرگى قۇرامىنا الدىڭعىلاردان قولايسىز جوبالار قالعان. ۇكىمەت دەڭگەيىندە جۇيەلى شەشىم قاجەت. شىن مانىندە بۇل - ايسبەرگتىڭ سۋ بەتىندەگى كورىنىسى عانا»، - دەدى دەپۋتات پرەمەر- ءمينيستردىڭ ءبىرىنشى ورىنباسارى رومان سكلياردىڭ اتىنا جولداعان ساۋالىندا.
ايتۋىنشا، ساۋلەت- قۇرىلىس سالاسىنا ءبىرقاتار تۇيتكىلدى ماسەلەلەردىڭ جيىنتىعى بويىنشا ءتارتىپ ورناتۋ قاجەت.
«اكىمدىكتەردىڭ ساۋلەت- قۇرىلىس سالاسىنا قاتىستى شەشىمدەرى اشىق شىعارىلمايدى. شەشىم شىعارۋ كەزىندە قالا تۇرعىندارىنىڭ، ساۋلەتشىلەر مەن ۋربانيستەردىڭ پىكىرى ەسكەرىلمەيدى. كولىك، الەۋمەتتىك ينفراقۇرىلىم قاجەتتىگىن ەسكەرۋسىز شەشىم قابىلدانادى. قۇرىلىس كومپانيالارىنىڭ جەرگىلىكتى اتقارۋشى ورگانداردى مانيپۋلياتسيالاۋىنىڭ سالدارىنان قالالىق ورتا مەن جاسىل ايماقتار دەگراداتسيالانىپ، قالالاردىڭ قۇرىلىسى جۇيەسىز ءجۇرىپ، «ادام يلەۋلەرى» پايدا بولىپ جاتىر. جالپى قالالىقتاردىڭ ءومىر ساپاسى ناشارلادى. وسىلايشا قۇرىلىس كومپانيالارى تابىسقا كەنەلىپ، تۇرعىندار مەن اكىمدىكتەر پروبلەمالارعا تاپ كەلىپ جاتىر. ماكرودەڭگەيدە بۇل جاعداي قالالاردىڭ تەڭگەرىممەن دامۋىنا جانە ۇلتتىڭ ەكونوميكالىق، كرەاتيۆتى ءوسۋ ورتالىعىنا اينالۋىنا كەدەرگى كەلتىرەدى»، - دەدى ول.
دەپۋتاتتىڭ پايىمىنشا، بۇل جاعداي «حالىق ۇنىنە قۇلاق اساتىن مەملەكەت» تۇجىرىمىنا تۇبىرىمەن قايشى.
«سونداي- اق، الماتى تۇرعىندارىنىڭ باستاماسىن قولداي وتىرىپ، مەملەكەت باسشىسىنىڭ قاپشاعاي قالاسىنىڭ اتاۋىن وزگەرتۋ باستاماسىنىڭ جالعاسى رەتىندە ۇكىمەتكە الماتى قالاسىنداعى حالىقارالىق اۋەجايعا دىنمۇحامەد قونايەۆتىڭ اتىن بەرۋدى ۇسىنامىز»، - دەدى دەپۋتات.
