الماتىدا ەسىرتكى دايىنداپ، ساقتاعان مۋزىكالىق توپ سوتتالدى

الماتى. قازاقپارات - الماتىدا مۋزىكالىق توپتىڭ مۇشەلەرى پسيحوتروپتىق زاتتار مەن ەسىرتكىنى ساتۋ ماقساتىندا دايىنداپ، ساقتاعانى ءۇشىن ۇزاق مەرزىمگە سوتتالدى، دەپ حابارلايدى قازاقپارات ءتىلشىسى.
None
None

الماتى قالاسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا «Q-pop Mad Men» توبىنىڭ مۇشەلەرىنە قاتىستى قىلمىستىق توپتى قۇرۋ، وعان جەتەكشىلىك ەتۋ، اسا ءىرى مولشەردە پسيحوتروپتىق زاتتاردى دايىنداۋ، ساقتاۋ، وتكىزۋ فاكتىلەرى بويىنشا قىلمىستىق ءىس قارالدى. سوتتىڭ باسپا ءسوز قىزمەتىنىڭ مالىمەتىنشە، 2020 -جىلى قىركۇيەك ايىنىڭ باسىندا ح. ەسىمدى ازامات قىلمىستىق توپ قۇرعان. ونىڭ قۇرامىنا 6 ادام كىردى. بارلىعى زاڭسىز مەفەدرون پسيحوتروپتىق زاتىنىڭ بالاماسىن دايىنداپ، كەيىننەن وتكىزىپ جىبەرۋ ءۇشىن ەسىرتكى زاتىن (گاشيشتى) ساقتاپ كەلگەن. قىلمىستىق توپتىڭ جەتەكشىسى ح. مەفەدرون وندىرۋگە ارنالعان قۇرامداس بولىكتەردى الۋمەن اينالىسىپ، ساتىپ الۋشىلارمەن كەلىسسوزدەر جۇرگىزگەن. توپتىڭ باسقا مۇشەلەرى الماتى قالاسىندا زەرتحانا رەتىندە جابدىقتالعان كوتتەدجدىڭ جەرتولەسىندە پسيحوتروپتىق زاتتاردى ءوندىرىپ، ولاردى بولەك دوزاعا سالىپ، قۇنى تۋرالى اقپاراتتى ارنايى قۇرىلعان سايتتار مەن چاتتاردا جاريالاعان. توپتىڭ قالعان مۇشەلەرى الماتىداعى قوعامدىق ورىندارعا بەتبەلگى قويۋمەن اينالىسقان.

سوتتا پروكۋرور ايىپتاۋدى قولداپ، قىلمىستىق توپتىڭ باسشىسىن 18 جىلعا، ال قالعان قاتىسۋشىلاردى 17 جىلدان 17,5 جىلعا دەيىن باس بوستاندىعىنان ايىرۋدى سۇرادى.

«سوت ۇكىمىمەن ح. ۇيىمداسقان توپ قۇرۋ جانە وعان جەتەكشىلىك ەتۋ، اسا ءىرى كولەمدە وتكىزۋ ماقساتىندا پسيحوتروپتىق زاتتىڭ انالوگىن زاڭسىز دايىنداۋ، ساقتاۋ، ەسىرتكىنى ەلەكتروندىق اقپاراتتىق رەسۋرستاردى پايدالانۋ ارقىلى ۇيىمداسقان توپتىڭ قۇرامىمەن ساتۋ ماقساتىندا ساقتاۋ قىلمىستارىن جاساعانى ءۇشىن كىنالى دەپ تانىلدى. ول 17 جىلعا باس بوستاندىعىنان ايىرىلدى. قالعان قاتىسۋشىلاردىڭ ۇشەۋىنە 16 جىل، تاعى بىرىنە 15 جىل، 3 ايعا باس بوستاندىعىنان ايىرۋ جازاسى تاعايىندالدى»، - دەپ حابارلادى قالالىق قىلمىستىق ىستەر جونىندەگى مامانداندىرىلعان اۋدانارالىق سوتىنىڭ باسپا ءسوز قىزمەتى.

سوتتالۋشىلاردىڭ جاستارى مەن بۇرىن سوتتىلىعى جوقتىعى جەڭىلدىك تۇرىندە تانىلدى. سونىمەن قاتار، سوتتالۋشى س- نىڭ كىناسىن ءىشىنارا مويىنداۋى جەڭىلدەتەتىن ءمان- جاي دەپ تانىلدى. ۇكىم زاڭدى كۇشىنە ەنگەن جوق. بۇعان دەيىن حابارلاعانىمىزداي، مەيىرجان تورەبايەۆ پەن مەيىرحان شەرنيازوۆقا قاتىستى سوت قاۋلىسى وزگەرىسسىز قالدى.

سوڭعى جاڭالىقتار