ءاليا نازاربايەۆا ەكولوگيالىق ۇيىمدار قاۋىمداستىعى ءتورالقاسىنىڭ باسشىسى وكىلەتتىگىن دوعاردى
بۇل اقپاراتتى اتالعان قاۋىمداستىقتىڭ باسقارما ءتوراعاسى ايگۇل سولوۆيەۆا راستادى، دەپ حابارلايدى قازاقپارات ءتىلشىسى.
«20- قاڭتاردان كەيىن ءاليا نۇرسۇلتان قىزىنان ءتورالقا ءتوراعاسى وكىلەتتىگىن دوعارعىسى كەلەتىندىگى تۋرالى ءوتىنىش كەلىپ ءتۇستى. وسىدان كەيىن ءبىز جينالىس، سەزد وتكىزىپ، بۇل جايىندا جاريا ەتتىك. وعان اتقارعان جۇمىسى ءۇشىن ريزاشىلىعىمىزدى بىلدىردىك. جالپى، ول ەشقاشان ىسىمىزگە ارالاسقان ەمەس، نۇسقاۋلىق تا بەرگەن جوق. ونىمەن جۇمىس ىستەۋ وتە قولايلى بولدى. ءبىز ونىڭ ءوتىنىشىن قاناعاتتاندىردىق جانە ءتورالقا ينستيتۋتىن تاراتۋ تۋرالى شەشىم قابىلدادىق»، - دەدى قاۋىمداستىقتىڭ باسقارما ءتوراعاسى قازاقپارات تىلشىسىنە تەلەفون ارقىلى بەرگەن سۇحباتىندا.
سونىمەن قاتار ول قاۋىمداستىق جۇمىسىن جالعاستىراتىندىعىن اتاپ ءوتتى.
«بارلىق مۇشەسى ورنىندا. قىزمەتىمىزدىڭ نەگىزىندە كورسەتىلگەن بارلىق باعىتتار بويىنشا بەلسەندى جۇمىس ىستەپ جاتىرمىز»، - دەدى ايگۇل سولوۆيەۆا.
اۆتور: مارلان جيەمباي
