قازاقستاندا پوليتسەيدى شاقىرماستان ەۋروحاتتاما تولتىرۋ مۇمكىندىگى بولادى

نۇر- سۇلتان. قازاقپارات - 2024 -جىلدان باستاپ قازاقستاندا ۇساق جول- كولىك وقيعالارى كەزىندە ەۋروحاتتاما تولتىرۋ مۇمكىندىگى بولادى.
None
None

بۇل تۋرالى ءماجىلىس دەپۋتاتى دانيا ەسپايەۆا ءمالىم ەتتى، دەپ حابارلايدى قازاقپارات ءتىلشىسى.

«قازاقستان رەسپۋبليكاسىنىڭ كەيبىر زاڭنامالىق اكتىلەرىنە ساقتاندىرۋ نارىعىن جانە باعالى قاعازدار نارىعىن رەتتەۋ مەن دامىتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ماقۇلداندى. وسى قۇجاتتا ەۋروحاتتاما قاعيداتىن ىسكە قوسۋ نورماسى قاراستىرىلعان.

«زاڭ جوباسىندا اۆتوكولىگى بارلار ءۇشىن ءتيىستى قادامدار قاراستىرىلعان. ۇساق جول كولىك وقيعالارى كەزىندە جانە جاراقات الماعاندار بولسا، موبيلدى قوسىمشانى پايدالانىپ، ساقتاندىرۋ تولەمىن الۋعا بولادى. بۇل رەتتە كولىك يەلەرى كەلتىرىلگەن شىعىنمەن ءوزارا كەلىسۋى كەرەك. وسى ورايدا جول- كولىك وقيعاسى ورنىندا كولىكتەر موبيلدى قوسىمشا ارقىلى سۋرەتكە ءتۇسىرىلىپ، ءبىرىڭعاي دەرەكقور بازاسىنا جىبەرىلەدى. وسىنىڭ نەگىزىندە ساقتاندىرۋ كومپانياسى وتەماقى تولەيدى»، - دەدى د. ەسپايەۆا تىلشىلەر ساۋالىنا جاۋاپ بەرە وتىرىپ.

ونىڭ ايتۋىنشا، كوپ جاعدايدا ۇساق جول- كولىك وقيعالارى كەزىندە جۇرگىزۋشىلەر ءوز قالتاسىنان وتەماقى بەرىپ، تارقاسىپ جاتادى.

«ەندى جاڭا ءتارتىپ بويىنشا پوليتسەيلەردى شاقىرماستان جانە سوتقا جۇگىنبەستەن ساقتاندىرۋ تولەمىن الۋ مۇمكىندىگى بولادى. بۇل ەۋروحاتتاما ءراسىمى ەۋروپانىڭ كوپتەگەن ەلدەرىندە جانە رەسەي، بەلارۋس، وزبەكستان سياقتى ءبىرقاتار مەملەكەتتە قولدانىلىپ كەلەدى»، - دەدى دەپۋتات.

ساقتاندىرۋ تولەمى ءبىر ساقتاندىرۋ جاعدايى بويىنشا 100 اەك شەگىندە جۇزەگە اسىرىلعان جاعدايدا ەۋروحاتتامانى قولدانۋ ەسكەرىلگەن.

«تولەمدەردى الۋدى جەڭىلدەتەتىن ەۋروحاتتاما تالاپتارى 2024 -جىلدان باستاپ كۇشىنە ەنەدى. سەبەبى، الدىمەن موبيلدى قوسىمشانى قۇرىپ، ءبىرىڭعاي مالىمەتتەر بازالارىن بىرىكتىرۋ كەرەك. سوندىقتان 2024 -جىلدان ەۋروحاتتاما قاعيداتى بويىنشا جۇمىس ىستەيدى»، - دەپ ناقتىلادى دانيا ەسپايەۆا.

اۆتور: رۋسلان عابباسوۆ



سوڭعى جاڭالىقتار