الاكولدەگى اۋەجايدىڭ ۇشۋ جولاعى ۇلكەن ۇشاقتار قونۋ ءۇشىن جاڭارتىلىپ جاتىر

تالدىقورعان. قازاقپارات - الماتى وبلىسى الاكول اۋدانىنداعى ءۇشارال اۋەجايىنىڭ ۇشۋ الاڭى جاڭارتىلىپ جاتىر، دەپ حابارلايدى قازاقپارات ءتىلشىسى.

بۇل الداعى ۋاقىتتا Airbus 320, Boeing 757 سىندى ءىرى ۇشاقتاردى قابىلداۋعا مۇمكىندىك بەرەدى. كۇردەلى جوندەۋ جۇمىستارىنا 9,3 ميلليارد تەڭگە قاراستىرىلىپ وتىر. ۇزىندىعى 2,7 شاقىرىم بولاتىن جالپى قالىڭدىعى 52 سانتيمەترلىك بەتون قۇيۋ جۇمىستارى قارقىندى ءجۇرىپ جاتىر. 100 دەن استام جۇمىسشى ەكى اۋىسىممەن ەڭبەك ەتىپ ءجۇر. ۇشۋ الاڭىنىڭ قاۋىپسىزدىك شارالارىنا ەرەكشە ءمان بەرىلىپ، قورشالىپ، زاماناۋي بەينەكامەرا ورناتىلادى. سەرپىندى جوبا ايدىندى الاكولگە شەتەلدەن جانە ەلىمىزدىڭ باسقا دا اۋماقتارىنان تۋريستەردىڭ كوپتەپ كەلۋىنە جاعداي تۋعىزادى. بيىل كولگە 1 ميلليوننان استام دەمالۋشى كەلەدى دەپ جوسپارلانعان.

«قۇرىلىس 2021 -جىلى 1-قىركۇيەكتە باستالدى. كەلىسىمشارت بويىنشا 2023 -جىلى اياقتالادى. ءبىراق ءبىز مەرزىمىنەن ەرتە اياقتاۋعا تىرىسامىز. بۇل ۇشۋ الاڭىنىڭ ەرەكشەلىگى - قازىرگى زامان تالابىنا ساي جارىق شامدارى ورناتىلعان. ۇشاقتاردى كۇندىز دە، تۇندە دە قابىلداي الادى»، - دەيدى مەردىگەر كاسىپورىننىڭ زەرتحانا باسشىسى داۋرەن قۇلبەكوۆ.