اتىراۋ قالاسىنىڭ ماڭىندا بالىقتىڭ قىرىلۋ سەبەبى ايتىلدى

بۇدان بۇرىن اتىراۋ قالاسىنىڭ ماڭىندا بالىق قىرىلعانىن جازعان ەدىك. بۇگىن، 26-ساۋىردە اتىراۋ قالالىق اكىمدىگىنە قاراستى قايىرشاقتى اۋىلدىق وكرۋگىندەگى بەزىمياننىي كولىندە بالىق قىرىلعان. اتالعان سۋ ايدىنىنا ارناي قۇرىلعان كوميستسيا قۇرامىندا « جايىق- كاسپي» وبلىسارالىق باسسەيندىك بالىق شارۋاشىلىعى ينسپەكتسياسىنىڭ ينسپەكتورلارى جىبەرىلدى. ينسپەكتورلار بالىقتىڭ السىرەگەن كۇيدە قايراڭعا شىعىپ قالعانىن انىقتادى.
«بالىقتىڭ قىرىلۋىنا قايراڭ جەرگە شىعىپ قالعانى سەبەپ بولۋى مۇمكىن. السىرەگەن بالىقتاردى قۇتقارۋ جۇمىستارى جۇرگىزىلدى. سوڭعى بەس كۇن بويى بەزىمياننىي كولىنە سۋ كەلىپ جاتىر. ءبىراق، بالىقتىڭ ءولۋ دەرەگى تىركەلمەدى. ولگەن بالىقتاردى سانيتارلىق تالاپقا ساي جويۋ قولعا الىندى»، - دەيدى ينسپەكتسيا باسشىسى نۇرلىبەك گايسين.
وبلىستىق بالىق شارۋاشىلىعى باسقارماسىنىڭ باسشىسى ارتۋر سادىبەك ۇلى مالىمەتىنشە، كوكتەمدە بالىقتار ۋىلدىرىق شاشۋ ءۇشىن قولايلى ورىسكە شىعادى. بۇگىن قىرىلعان بالىق كانال اۋزىنا كەلىپ تىرەلىپ قالعان. ءقازىر قاراكوز بالىعىنىڭ 65 كەلى ءولى شاباعى جينالعان.
«قازىر بالىقتاردىڭ ۋىلدىرىق شاشۋ ورنىنا ەركىن كىرۋى ءۇشىن قايىرشاقتى وكرۋگى اۋماعىنان 800 مەتر كانال قازىلدى. كانالدىڭ تەرەڭدىگى - شامامەن 1 مەتر. ماماندار ولگەن بالىقتى جيناپ الدى. ولگەن بالىق سانيتارلىق تالاپتارعا سايكەس كومۋ جولىمەن جويىلادى. ءتىرى بالىقتار ءسۇزىلىپ، جايىق وزەنىنە جىبەرىلەدى»، - دەدى ارتۋر سادىبەك ۇلى.