بىلتىر كەدەيلىكتىڭ ەڭ جوعارى دەڭگەيى قاي وبلىستاردا تىركەلدى

نۇر-سۇلتان. قازاقپارات - وتكەن جىلى كەدەيلىكتىڭ ەڭ جوعارى دەڭگەيى تۇركىستان جانە ماڭعىستاۋ وبلىستارىندا تىركەلدى، دەپ حابارلايدى قازاقپارات.

ۇلتتىق ستاتيستيكا بيۋروسىنىڭ مالىمەتىنشە، ءۇي شارۋاشىلىقتارىن زەرتتەۋ دەرەكتەرى تابىسى ەڭ تومەنگى كۇنكورىس دەڭگەيىنىڭ شاماسىنا جەتپەيتىن حالىقتىڭ ۇلەسى %5,2 قۇراعانىن كورسەتكەن.

«بىلتىر وڭىرلەر بولىنىسىندەگى كەدەيلىكتىڭ ەڭ جوعارى دەڭگەيى تۇركىستان، ماڭعىستاۋ وبلىستارىندا، ال ەڭ از ۇلەسى نۇر-سۇلتان قالاسىندا تىركەلدى»، - دەپ جازدى ۆەدومستۆو.

حابارلامادا قالا مەن اۋىل تۇرعىندارى تابىسىنىڭ ەداۋىر سارالانۋى ساقتالعانى دا ايتىلعان.

ماسەلەن، قالالىق جەردەگى تابىسى ەڭ تومەنگى كۇنكورىس دەڭگەيىنەن از حالىقتىڭ ۇلەسى %3,8 بولسا، اۋىلدىق جەردە - %7,2.

2021- جىلى كەدەيلىكتىڭ اۋىلدىق جانە قالالىق دەڭگەيلەرى اراسىنداعى ەڭ ۇلكەن ايىرماشىلىق اتىراۋ (9,1 ەسە) مەن ماڭعىستاۋ (4,3 ەسە) وبلىستارىندا بايقالدى.

«قازاقستاندا وتكەن جىلى جان باسىنا شاققانداعى ەڭ تومەنگى كۇنكورىس دەڭگەيىنىڭ شاماسى ورتا ەسەپپەن ايىنا 37266 تەڭگەنى قۇرادى. بۇل رەتتە ءاربىر ءوڭىردىڭ ءوزىنىڭ ەڭ تومەنگى كۇنكورىس دەڭگەيى ەسەپتەلەدى»، - دەپ تولىقتىردى ۇلتتىق ستاتيستيكا بيۋروسى.