جاڭا قازاقستاندى قۇرۋ ءۇشىن باتىل وزگەرىستەر جاساۋىمىز كەرەك - پرەزيدەنت

بۇل تۋرالى AMANAT پارتياسىنىڭ سەزىندە پرەزيدەنت قاسىم-جومارت توقايەۆ ءمالىم ەتتى، دەپ حابارلايدى قازاقپارات ءتىلشىسى.
«مەن جۇما كۇنى كونستيتۋتسياعا وزگەرىس ەنگىزۋ ماسەلەسىمەن اينالىسىپ جاتقان جۇمىس توبىنىڭ مۇشەلەرىمەن كەزدەستىم. بۇل توپ قىسقا مەرزىم ىشىندە كوپ ءىس تىندىردى. زاڭگەر عالىمدار اتا زاڭ باپتارىنىڭ ۇشتەن بىرىنە ەنگىزىلەتىن وزگەرىستەردىڭ جوباسىن ازىرلەدى. وسىلايشا، ءبىز وتە جاۋاپتى ءارى ايرىقشا ماڭىزدى كەزەڭگە قادام باستىق. شىن مانىندە، كونستيتۋتسيالىق رەفورما - تاۋەلسىزدىك تاريحىنداعى جاڭا بەلەس. مۇنىڭ ءبارى ۋاقىت تالابىنان جانە قوعام سۇرانىسىنان تۋىنداپ وتىر. ءبىز جاڭا قازاقستاندى قۇرۋ ءۇشىن باتىل وزگەرىستەر جاساۋىمىز كەرەك»، - دەدى قاسىم-جومارت توقايەۆ.
وسى ورايدا پرەزيدەنت بۇل وزگەرىستى اركىم وزىنەن باستاۋى قاجەت ەكەنىن قاداپ ايتتى.
«ەڭ باستىسى، ونى ناقتى ىسپەن كورسەتە بىلۋگە ءتيىس»، - دەدى مەملەكەت باسشىسى.
بۇدان بۇرىن حابارلانعانداي، بۇگىننەن باستاپ پرەزيدەنتتىڭ AMANAT پارتياسىنىڭ ءتوراعاسى رەتىندەگى وكىلەتتىگى توقتادى.
قاسىم-جومارت توقايەۆ AMANAT پارتياسىنىڭ ءتوراعالىعىنا ەرلان قوشانوۆتى ۇسىندى.
بيىل ناۋرىز ايىندا «ADAL» پارتياسىنىڭ ءتوراعاسى سەرىك سۇلتانعالي پارتيانىڭ AMANAT- قا قوسىلۋ شەشىمىن ءتۇسىندىردى.