بەتپەردەنى مىندەتتى تۇردە كيۋدى توقتاتقان ەلدەر اتالدى
Kaz.tengritravel.kz ءتىلشىسى قاي ەلدەر بەتپەردەنى مىندەتتى تۇردە كيۋدەن باس تارتقانىن ايتادى.
20-ساۋىردەن باستاپ يسپانيادا دۇكەندەر، سۋپەرماركەتتەر، مەيرامحانالار، بارلار، سپورت زالدارى، تەاترلار مەن كينوتەاترلاردا مىندەتتى تۇردە بەتپەردە كيۋ توقتاتىلدى. ەرەجە مەديتسينالىق مەكەمەلەرگە، ءدارىحانالارعا، قارتتار ۇيلەرىنە جانە قوعامدىق كولىكتەرگە قولدانىلمايدى.
21-ساۋىردە پورتۋگاليانىڭ دەنساۋلىق ساقتاۋ ءمينيسترى مارتا تەميدو تۋريستەر مەن ەل ازاماتتارى مەيرامحانالار، كافەلەر، ساۋدا ورتالىقتارى مەن مۇراجايلار سياقتى كوپتەگەن قوعامدىق ورىندا بەتپەردە كيۋگە مىندەتتى ەمەس ەكەنىن مالىمدەدى. دەگەنمەن، ەرەجە مەديتسينالىق مەكەمەلەردە جانە الەۋمەتتىك وسال توپقا جاتاتىن ادامدار باراتىن باسقا دا نىسانداردا قولدانىلادى.
گرەكيا بيلىگى 1-ماۋسىمنان باستاپ عيمارات ىشىندە بەتپەردە كيۋ تۋرالى تالاپتار الىنىپ تاستالاتىنىن جانە گرەكياعا كىرۋ ءۇشىن ۆاكتسينانىڭ تسيفرلىق سەرتيفيكاتىن ۇسىنۋ تۋرالى تالاپتى الىپ تاستاۋدى قاراستىرىپ جاتقانىن ايتتى. دەنساۋلىق ساقتاۋ ءمينيسترى تانوس پليەۆريس شەكتەۋلەردى جەڭىلدەتۋ «ەپيدەميولوگيالىق مالىمەتتەر مەن ساراپشىلاردىڭ ۇسىنىستارىنا نەگىزدەلگەنىن» مالىمدەدى.
سونداي-اق، اتور مالىمەتىنشە، 16-ساۋىردەن باستاپ اۆستريا استاناسى ۆەناداعى كوپشىلىك ورىنداردا بەتپەردە رەجيمى توقتاتىلدى. FFP2 ءتيپتى رەسپيراتورلاردى كيۋ تۋرالى تالاپ مەديتسينالىق مەكەمەلەرگە، ءدارىحانالارعا، بانكتەرگە، پوشتا بولىمشەلەرىنە، ءبىرىنشى قاجەتتىلىكتەگى دۇكەندەرگە باراتىندار جانە قوعامدىق كولىكتەرگە وتىراتىندار ءۇشىن كۇشىندە قالادى.
ۆەنادا 2G تالابى جويىلدى. ەلدە تاماقتانۋ ورىندارى مەن مادەني شارالارعا تەك COVID-19-دان جازىلعان نەمەسە ۆاكتسينا العان ادامدار ءتيىستى سەرتيفيكاتتار مەن انىقتامالاردى ۇسىنىپ، كىرۋگە رۇقسات ەتىلدى. قالعان ايماقتاردا ەلدەر بۇل ەرەجەدەن بەسىنشى ناۋرىزدان باستاپ باس تارتتى.
سلوۆاكيادا 21-ساۋىردەن باستاپ بەتپەردەنى تەك اۋرۋحانالاردا، ەمحانالاردا جانە الەۋمەتتىك قورعاۋ مەكەمەلەرىندە كيۋ كەرەك.
سونىمەن قاتار، 6-ساۋىردەن باستاپ ەل كىرۋگە شەكتەۋلەردى الىپ تاستادى جانە بارلىق تۋريست ۆاكسينالاۋ مارتەبەسىنە قاراماستان، سلوۆاكيا رەسپۋبليكاسىنىڭ اۋماعىنا كىرە الادى.
ا ق ش-تا قوعامدىق كولىكتەردەگى بەتپەردە رەجيمى توقتاتىلدى. كۇشىن جويۋ تۋرالى شەشىمدى ا ق ش اۋداندىق سۋدياسى كەترين ميتچەلل قابىلدادى.
برازيليا، پاراگۆاي جانە ۋرۋگۆاي سياقتى لاتىن امەريكاسى ەلدەرى دە بەتپەردەنى مىندەتتى تۇردە كيۋ ەرەجەسىنەن باس تارتۋعا شەشىم قابىلدادى. بۇل شەشىم ايماقتاعى COVID-19 جاعدايلارىنىڭ تومەندەۋىنە جانە ۆاكسينالاۋمەن قامتۋ دەڭگەيىنىڭ جوعارىلاۋىنا بايلانىستى بولدى.
3-ساۋىردە تۇركيادا بەتپەردە رەجيمى جويىلدى. بۇل تۋرالى تۇركيانىڭ دەنساۋلىق ساقتاۋ ءمينيسترى فاحرەتتين كودجا مالىمدەدى. ونىڭ ايتۋىنشا، جەتكىلىكتى جەلدەتۋ جانە الەۋمەتتىك قاشىقتىقتى ساقتاۋ مۇمكىندىگى بولعان جاعدايدا، جابىق بولمەلەردە قورعانىس قۇرالدارىن پايدالانۋ قاجەتتىلىگى دە الىنىپ تاستالادى.
