قاڭتاردا ورتەنگەن قازاق تەلەۆيزياسىنىڭ «التىن قور» مۇرالارى ءالى تۇگەندەلىپ جاتىر

بۇل تۋرالى ق ر اقپارات جانە قوعامدىق دامۋ ۆيتسە-ءمينيسترى نۇرگۇل ماۋبەرلينوۆا قازاقپاراتتىڭ ساۋالىنا جولداعان جاۋابىندا ايتتى.
«قاڭتار وقيعاسى كەزىندە «Qazaqstan» تەلەراديوكورپوراتسياسىنىڭ الماتىداعى فيليالىنىڭ عيماراتىندا بولعان ورتتەن سيفرلانعان بەينەقور ساقتالعان Cinegy جۇيەسىنىڭ سەرۆەرلەرى ورتەندى. بۇگىنگى تاڭدا «Qazaqstan» تەلەراديوكورپوراتسياسىنىڭ تەحنيكالىق ماماندارى زاقىمدانعان سەرۆەرلەردەگى بەينەماتەريالداردى جاڭا سەرۆەرلەرگە كوشىرۋ جۇمىستارىن جۇرگىزۋدە. ماتەريالداردىڭ قانشا پايىزى قالپىنا كەلتىرىلىپ، قانشاسى جارامسىز بولاتىنى كوشىرۋ پروتسەسى تولىق اياقتالعاندا انىقتالادى. ماتەريالدار سۇرىپتالىپ، تالداۋ جاسالعاننان كەيىن ناقتى ساندىق مالىمەتتەردى ۇسىناتىن بولامىز»، - دەپ جازىلعان ۆيتسە-ءمينيستردىڭ جاۋابىندا.
سونداي-اق، ول «قازاقستان» تەلەراديوكورپوراتسياسى تاراپىنان «التىن قورى» سيفرلاندىرۋ جانە ونى مەملەكەت قورىنا وتكىزۋ بويىنشا كەشەندى جۇمىستار جۇرگىزىلىپ جاتقانىن اتاپ ءوتتى.
«قازىرگى ۋاقىتتا كورپوراتسيا قورىندا جالپى ۇزاقتىعى 17 مىڭ ساعاتتى قۇرايتىن 100 مىڭعا جۋىق اۋديوتاسپا ساقتالعان. ولاردىڭ بارلىعى سيفرلاندىرىلدى. 25000 اۋديوتاسپانى 2022 -جىلدىڭ سوڭىنا دەيىن مەملەكەتتىك ساقتاۋعا قازاقستان رەسپۋبليكاسىنىڭ كينوفوتوقۇجاتتار جانە دىبىس جازبالارىنىڭ ورتالىق مەملەكەتتىك مۇراعاتىنا بەرۋ جوسپارلانىپ وتىر. 2021 -جىلدىڭ سوڭىنان باستاپ كورپوراتسيانىڭ https://altynqor.com/ سايتى اشىلىپ، قورداعى اۋديو جانە بەينەتاستاپالار قۇندىلىعىنا قاراي مەدياپورتالعا جۇكتەلە باستادى. مەدياپورتال «بەينەقور»، «اۋديوقور»، «تۇلعالار» جانە «فوتوارحيۆ» بولىمدەرىنەن تۇرادى. ءار بولىمدە تەلەۆيزيا جانە راديو ارداگەرلەرىنىڭ، قازاق ادەبيەتى مەن مادەنيەتى قايراتكەرلەرىنىڭ سۇحباتتارى، ەستەلىكتەرىنەن تۇراتىن 50 تەلەحابار سيكلى، «سوۆەتتىك قازاقستان» كينوجۋرنالى مەن «قازاق تەلەفيلم» وندىرىستىك بىرلەستىگىنىڭ جوبالارى بار. «اۋديوقور» بولىمىندە 1954 -جىلدان بەرگى ساقتالعان 100 ۇلت قايراتكەرىنىڭ ءار جىلدارى جازىلىپ الىنعان داۋىستارى، 100 كۇي، 100 ەرتەگى، باتىرلار جىرىنىڭ 50 نۇسقاسى توپتاستىرىلدى. قازىرگى ۋاقىتتا مەدياپورتالدا 1318 ۆيدەو، 701 اۋديو جۇكتەۋلى. سايتتى تولىقتىرۋ جۇمىستارى تۇراقتارى تۇردە جالعاسادى»، - دەلىنگەن جاۋاپتا.
قاڭتار وقيعاسى كەزىندە «Qazaqstan» ارناسىنىڭ كەڭسەسىندەگى «التىن قور» قويماسى ورتەنگەنى حابارلانعان بولاتىن . قازىرگى تاڭدا «قازاقستان» تەلەراديوكورپوراتسياسىنىڭ «التىن قور» سايتى جۇمىس ىستەپ تۇر.
اۆتور: ەسىمجان ناقتىباي