پاۆلودارلىق عالىمدار تۇنگى كوبەلەكتىڭ جاڭا ءتۇرىن تاپتى - فوتو

پاۆلودار. قازاقپارات - پاۆلودارلىق ەنتامولوگ- عالىم سەرگەي تيتوۆ پەن ونىڭ ارىپتەستەرى تۇنگى كوبەلەكتەرگە قاتىستى عىلىمي جاڭالىق اشتى، دەپ حابارلادى قازاقپارات.

وقىمىستىلار قاراعاندى مەن يەن دالادا جازعى زەرتتەۋ بارىسىندا تۇنگى كوبەلەكتىڭ Catocala helena اتتى جاڭا تۇرىمەن كەزدەسكەن.

«جاڭا ءتۇر الدىمەن قاراعاندىدان تابىلدى. بىزگە قازاقستان بيوالۋاندىعى قاۋىمداستىعىنىڭ وكىلى گەنريەتتا پۋليكوۆا مەن زوولوگيا ينستيتۋتىنىڭ وكىلى الەنا كاپتەنكينا قولداۋ كورسەتتى. كەيىن پاۆلودار وڭىرىنەن تاپتىق. بۇل - كوشىپ- قوناتىن، ينۆازيۆتى جانە قالالىق ورتادا تۇراتىن ءتۇر. سوڭعى جىلدارى Catocala helena تۋرالى رەسەيلىك ەنتامولوگتار تالقىلاۋ جۇرگىزۋدە. بىزگە ەش قاتىسى بولماعان. جۋىردا رەسەي ەنتامولوگتارى بۇل كوبەلەكتىڭ تابىلعانى تۋرالى ءبىرقاتار ماتەريال جاريالادى. وندا جاندىكتىڭ نەگىزگى ارەالىنان الىس جەردە تۇراتىنى جانە شىعىستان باتىسقا كوشىپ جۇرەتىنى تۋرالى ايتىلعان»، - سەرگەي تيتوۆ.

ونىڭ مالىمەتىنشە، تۇنگى كوبەلەكتىڭ بۇل ءتۇرى باستاپقىدا رەسەيدىڭ الىس شىعىس، كورەيا، قىتاي، موڭعوليا ورماندارىندا تىرشىلىك ەتكەن. سوڭعى جىلدارى بايكال، باتىس ءسىبىر، وڭتۇستىك ورال، رەسەيدىڭ ەۆروپالىق ايماقتارىندا بايقالا باستادى.

«كوبەلەك قازاقستان اۋماعىنا دا كەلدى. ءبىز قۇپيا جاندىكپەن كەزدەستىك. بۇل ءتۇردىڭ نەلىكتەن شىعىستان باتىسقا قونىس اۋدارعانى بەلگىسىز. ينۆازيۆتى تۇرلەرى كارانتيندى تۇرلەرى سياقتى ەكوجۇيەگە كەرى اسەرىن تيگىزەدى. بۇل جاندىك قالا ورتاسىنا زيان كەلتىرمەۋى مۇمكىن. ءبىز Catocala helena-نىڭ ءتىلىن باقىلاپ، ينۆازيۆتى ءتۇرىنىڭ قازاقستان تابيعاتىنا قانداي اسەر ەتەتىنىن زەرتتەيمىز»، - دەدى عالىم.