رەسەيدە باۋىرجان مومىش ۇلىنا قاتىستى «قۇپيا» قۇجاتتار تابىلدى

نۇر-سۇلتان. قازاقپارات - جاقىندا رەسەي فەدەراتسياسىنىڭ قازاقستانداعى توتەنشە جانە وكىلەتتى ەلشىسى الەكسەي بوروداۆكين رەسەي مەملەكەتتىك ساياسي- الەۋمەتتىك تاريح مۇراعاتىندا «قۇپيا» بەلگىسىمەن ساقتالعان حالىق قاھارمانى باۋىرجان مومىش ۇلىنا قاتىستى كەيبىر قۇجاتتاردى ونىڭ نەمەرە ءىنىسى بەكەت مومىنقۇلعا تاپسىردى.
None
None

ارحيۆتىك قۇجاتتاردى تاپسىرۋ ءراسىمى قازاقستان قارۋلى كۇشتەرىنىڭ مەملەكەتتىك اسكەري- تاريحي مۇراجايىندا ءوتتى. ولاردىڭ ىشىندە پارتيا بيلەتى مەن بولشيەۆيكتەردىڭ بۇكىل وداقتىق كوممۋنيستىك پارتياسى مۇشەسىنىڭ ەسەپ كارتوچكاسى، 1942 -جىلى جازىلعان ب ب ك پ مۇشەسىنىڭ تىركەۋ بلانكىسى، فوتوسۋرەتتەرى جانە ت. ب. بار.

الەكسەي بوروداۆكين ءوز سوزىندە بيىل ەكى ەلدىڭ ديپلوماتيالىق قارىم- قاتىناسىنا 30 جىل تولعانىن ايرىقشا اتاپ ءوتتى.

«ءبىز - وداقتاستارمىز جانە دوسپىز. بۇگىنگى قازاقستاندىق دوستارىمىزعا بەرىلگەن مۇراعاتتىق قۇجاتتار وسى قارىم- قاتىناستىڭ دالەلى»، دەدى ەلشى.

ەندىگى كەزەكتە رەسەي تاراپى ماسكەۋ جانە پودولسك قالاسىنداعى 11 مىڭنان استام اسكەري قۇجاتتار ساقتالعان مۇراعاتتارمەن جۇمىس ىستەۋگە مۇمكىندىك بەرۋگە دايىن.

«وتە قۇپيا» دەگەن بەلگىسى بار قۇجاتتار حالىق باتىرى باۋىرجان مومىش ۇلىنىڭ ءومىربايانىنداعى ايتىلماي قالعان تاريحي دەرەكتەردى عانا ەمەس، ۇلى وتان سوعىسىنىڭ باسىندا ماسكەۋ ءۇشىن بولعان ۇرىستا شايقاسقان ايگىلى پانفيلوۆ ديۆيزياسىنىڭ تاريحي ەرلىكتەرىن تولتىرۋعا كومەكتەسەدى.

ارمان ماناربەك ۇلى

Egemen.kz

سوڭعى جاڭالىقتار