09:03, 25 - ءساۋىر 2022 | GMT +5
شاڭحايداعى لوكداۋن ساۋدانى تەجەيدى - ساراپشىلار
نۇر- سۇلتان. قازاقپارات - لوكداۋن سالدارىنان شاڭحاي كەمەجايلارىندا تاۋار جەتكىزۋگە قاتىستى قيىندىقتار تۋىندادى، دەپ حابارلايدى «حابار 24».

تەرمينالداعى كۇتۋ ۋاقىتى ەكە ەسەدەي ارتقان. جۇزدەگەن سۋ كولىگى كەزەكتە تۇر. ەندىگى كەلگەنىن كورشى پورتتارعا جىبەرۋگە تۋرا كەلەدى. ساراپشىلار مۇنىڭ ءبارى جاھاندىق تاۋار جەتكىزۋ ىسىنە كەرى اسەر ەتۋى مۇمكىن دەيدى. ويتكەنى قىتايدان ەكسپورتتالاتىن تاۋارلار تيەلگەن كونتەينەرلەردىڭ بەستەن ءبىرى وسى شاڭحاي كەمەجايى ارقىلى وتەدى.
ايتا كەتكەن ءجون، قالادا قاتاڭ لوكداۋن 28- ناۋرىزدا ەنگىزىلگەن. جەرگىلىكتى كاسىپورىندار مەن دۇكەندەردىڭ كوبى جۇمىس ىستەمەيدى. تۇرعىندارعا مۇمكىندىگىنشە ۇيدەن شىقپاۋ ەسكەرتىلگەن. ەپيداحۋال دا ءالى جاقسارماي تۇر. كەيىنگى تاۋلىكتە 39 ادام كوز جۇمدى. بۇل لوكداۋن جاريالانعاننان بەرى تىركەلگەن ەڭ ۇلكەن كورسەتكىش.