زەلەنسكي: جاۋلانعان جەردى قايتارامىز

نۇر-سۇلتان.قازاقپارات - «ءبىز قارۋ- جاراققا جەتكىلىكتى كولەمدە قول جەتكىزگەن بەتتە جاۋلاپ الىنعان جەرلەرىمىزدى ازات ەتۋگە كوشەمىز». ۆلاديمير زەلەنسكي كيەۆتەگى مەترو ستانتسياسىندا وسىلاي دەپ مالىمدەدى.

ۋكراينا پرەزيدەنتى قارسى سوعىس اشقاندار مىندەتتى تۇردە سوت الدىندا جاۋاپ بەرەتىنىنە سەنىمدى ەكەنىن دە ايتتى. ول سونداي- اق ەگەر رەسەي ماريۋپولدەگى ۋكراينالىق ساربازداردى قىرسا نەمەسە جاۋلاپ العان جەرلەرىندە جاڭا دەربەس رەسپۋبليكالار قۇرۋ تۋرالى رەفەرەندۋمدار وتكىزسە، كەلىسسوزدى توقتاتاتىنىن جەتكىزدى.

ۆلاديمير زەلەنسكي، ۋكراينا پرەزيدەنتى:

- ءبىز ولار جاۋلاپ العان جەردىڭ ءبارىن مىندەتتى تۇردە قايتارامىز. بۇل 10-20 جىل نەمەسە 2014 جىلدان كەيىنگى سياقتى 8 جىلعا سوزىلمايدى، بىردەن قايتارامىز. ماسەلە قارۋعا بايلانىستى. قولىمىزعا جەتكىلىكتى كولەمدە قارۋ- جاراق الىسىمەن جاۋلاپ الىنعان جەرلەرىمىزدى دەرەۋ قايتارۋعا كوشەمىز.

مالىمەتكە قاراعاندا ۋكراينا كۇشتەرى كەيىنگى ءبىر كۇندە دونەتسك پەن لۋگانسك باعىتىنداعى 12 شابۋىلعا تويتارىس بەرگەن. بۇل تۋرالى ۋكراينانىڭ وپەراتيۆتىك شتابى حابارلادى.

شايقاس بارىسىندا ۋكراينا اسكەرى رەسەي كۇشتەرىنىڭ 4 تانكى، 5 زەڭبىرەگىن جانە 15 بروندى تەحنيكاسىن تالقانداپ، ءبىر سۋ-25 ۇشاعىن اتىپ تۇسىرگەن.

www.24.kz