قازاقستاندا ازاماتتاردىڭ كونستيتۋتسيالىق قۇقىقتارىن قورعاۋ تەتىگى ەداۋىر كۇشەيەدى - توقايەۆ

نۇر-سۇلتان. قازاقپارات - قازاقستاندا كونستيتۋتسياعا ەنگىزىلەتىن تۇزەتۋلەرگە وراي ازاماتتاردىڭ كونستيتۋتسيالىق قۇقىقتارى مەن بوستاندىقتارىن قورعاۋ تەتىگى ەداۋىر كۇشەيەدى.
None
None

بۇل تۋرالى مەملەكەت باسشىسى قاسىم-جومارت توقايەۆ كونستيتۋتسياعا وزگەرىستەر مەن تولىقتىرۋلار ەنگىزۋ جونىندەگى كەڭەس وتىرىسىندا ايتتى، دەپ حابارلايدى قازاقپارات.

مەملەكەت باسشىسى جيىندا ادام قۇقىقتارىن قامتاماسىز ەتۋگە قاتىستى تۇزەتۋلەردىڭ ماڭىزى زور ەكەنىن ايتتى.

«ازاماتتاردىڭ كونستيتۋتسيالىق قۇقىقتارى مەن بوستاندىقتارىن قورعاۋ تەتىگى ەداۋىر كۇشەيەدى. بۇل شەنەۋنىكتەردىڭ وزدەرى قابىلدايتىن اكتىلەردىڭ ساپاسىنا دەگەن جاۋاپكەرشىلىكتى ارتتىرادى دەپ سانايمىن. كونستيتۋتسيالىق دەڭگەيدە ادام قۇقىقتارى جونىندەگى تاۋەلسىز ۋاكىلدىڭ قۇزىرەتتەرى مەن كەپىلدىكتەرى بەكىتىلەدى. جالپى، ازىرلەنگەن وزگەرتۋلەر مەن تولىقتىرۋلار توپتاماسىنا جولداۋدا ايتىلعان ساياسي باستامالار مەن كونستيتۋتسياعا ەنگىزىلۋى قاجەت تۇزەتۋلەردى ىسكە اسىرۋعا ءتيىستى نورمالار عانا ەنگىزىلگەنىن اتاپ وتكەن ءجون. باسقا دا وزەكتى وزگەرتۋلەر كونستيتۋتسيالىق جانە باسقا دا زاڭدار اياسىندا بەكىتىلەدى»، - دەدى پرەزيدەنت.

قاسىم-جومارت توقايەۆ مەملەكەتتىك ورگانداردىڭ سىلبىر جۇمىس ىستەۋىنە جول بەرىلمەيتىنىن تاعى دا ەسكە سالىپ، سوڭعى ءۇش جىلدا ەلىمىزدەگى جانە الەمدەگى جاعدايدىڭ تۇبەگەيلى وزگەرگەنىن ايتتى.

«مەملەكەتتىك اپپارات كەز كەلگەن وزەكتى ماسەلەگە جەدەل، دەر كەزىندە نازار اۋدارۋى كەرەك. سوندىقتان جۇمىس توبى ۇسىنعان تۇزەتۋلەر ۇكىمەتكە ەرەكشە اكتىلەردى قابىلداۋعا مۇمكىندىك بەرەدى. بۇل داعدارىس كەزىندە جەدەل ارەكەت ەتۋدى قامتاماسىز ەتەدى. وسى ورايدا، پارلامەنتتىڭ قارقىندى جۇمىس ىستەگەنى وتە ماڭىزدى. دەپۋتاتتار قوس پالاتانىڭ بىرلەسكەن وتىرىسىندا زاڭ جوبالارىن شۇعىل قاراۋى كەرەك. جالپى، مەن جۇمىس توبى دايىنداعان بارلىق وزگەرىستەر مەن تولىقتىرۋلاردى ماقۇلدايمىن»، - دەدى مەملەكەت باسشىسى.

سوڭعى جاڭالىقتار