جەردىڭ يەسى حالىق دەگەن نورمانى كونستيتۋتسيادا ءبىرجولا بەكىتۋدىڭ ساياسي ءمانى زور - پرەزيدەنت
مەملەكەت باسشىسى قاسىم-جومارت توقايەۆ كونستيتۋتسياعا وزگەرىستەر مەن تولىقتىرۋلار ەنگىزۋ جونىندەگى كەڭەس وتىرىسىندا وسىلاي دەدى، دەپ حابارلايدى قازاقپارات.
وتىرىستا پرەزيدەنت قاسىم-جومارت توقايەۆ قوعام مەن مەملەكەت ءۇشىن اسا ماڭىزدى سانالاتىن جەرگە يەلىك ەتۋ ماسەلەسىن شەشۋ قاجەتتىگىنە ارنايى توقتالدى.
«جەردىڭ جانە تابيعي رەسۋرستاردىڭ يەسى حالىق دەگەن نورمانى كونستيتۋتسيادا ءبىرجولا بەكىتۋدىڭ ساياسي ءمانى زور بولماق جانە بولاشاقتا بۇل ماسەلەنى ءارتۇرلى تۇسىندىرۋگە جول بەرىلمەۋى كەرەك. وسىعان بايلانىستى، نەگىزگى زاڭنىڭ 6-بابىن مىناداي رەداكسيادا بەرۋ ۇسىنىلادى: «جەر جانە ونىڭ قويناۋى، سۋ، وسىمدىكتەر جانە جانۋارلار الەمى، باسقا دا تابيعي رەسۋرستار حالىققا تيەسىلى. مەملەكەت حالىق اتىنان مەنشىك يەلىگىن جۇرگىزۋگە قۇقىلى»، - دەدى پرەزيدەنت.
وسى رەتتە مەملەكەت باسشىسى از ۋاقىتتا وتە كوپ ءىس بىتىرگەنى ءۇشىن جۇمىس توبىنىڭ مۇشەلەرىنە ريزاشىلىعىن ءبىلدىردى.
«مەن بۇگىن كونستيتۋتسياعا وزگەرىستەر مەن تولىقتىرۋلار ەنگىزۋ تۋرالى زاڭ جوباسىن كونستيتۋتسيالىق كەڭەستىڭ قاراۋىنا ۇسىنامىن. بۇل - اتا زاڭىمىزدىڭ تالابى. كونستيتۋتسياعا ەنگىزىلەتىن تۇزەتۋلەر تاۋەلسىز قازاقستان تاريحىنىڭ كەلەسى پاراعىن اشادى دەپ سەنەمىن. مۇنى جاڭا قازاقستاندى قۇرۋ جولىنداعى ماڭىزدى بەلەس دەۋگە بولادى»، - دەپ تۇيىندەدى قاسىم- جومارت توقايەۆ.
