بالانىڭ ءسۇت تىستەرىنە قالاي كۇتىم جاساۋ كەرەك؟

نۇر-سۇلتان. قازاقپارات - ءتىس دارىگەرىنە ءبىرىنشى تەكسەرىسكە كەلگەن ەمدەلۋشىلەردىڭ كوپشىلىگىنەن ەمدەۋ كەرەك تىستەر تابىلادى.

قازىر ءتىستى ەمدەۋ اۋىرتپايدى، ءبىراق وتە قىمباتقا شىعادى. ەگەر بالاڭىزدىڭ ءسۇت تىستەرىنە دۇرىس كۇتىم جاساساڭىز، ەمدەۋدەن قۇتىلا الاسىز.

1. ءسۇت تىستەر دە ازۋ تىستەر سەكىلدى ماڭىزدى

«ءسۇت تىستەر ءبارىبىر ءتۇسىپ قالادى» دەپ كوپشىلىك اتا- انا ولارعا اسا ءمان بەرمەيدى. الايدا ءسۇت تىستەرگە دۇرىس قاراماۋ ۇلكەن قاتەلىك. سەبەبى ءسۇت تىستەردىڭ دۇرىس ءارى ساۋ ءوسۋى ادامنىڭ ستوماتولوگيالىق بولاشاعىنا اسەر بەرەدى. ءسۇت تىستەردەگى تىسجەگى ونىڭ استىنان ءوسىپ كەلە جاتقان جاڭا تىستەردى دە زاقىمدايدى. ال ەگەر ۋاقىتىندا ءسۇت تىستەردى قاراتپاي، ول ەمدەۋگە دە كەلمەي، جۇلدىرىپ تاستاساڭىز، ونىڭ دا ءوز قاۋىپتەرى بار. ول جاق گەومەترياسىنىڭ وزگەرۋىنە، شايناۋدىڭ بۇزىلۋىنا اكەلىپ، بولاشاقتا دەنە ءمۇسىنى، تىستەم جانە اسقورىتۋ پروبلەمالارىن تۋدىرۋى مۇمكىن.

2. بالانىڭ العاشقى ءتىسى شىققان كەزدەن باستاپ ءتىس تازالاۋ كەرەك

كوپشىلىك ستوماتولوگتار بالاعا كۇنىنە ەكى رەت اۋىز گيگيەناسى قاجەت ەكەنىن ايتادى: تاڭەرتەڭ جانە كەشكە تاماقتان كەيىن ءتىس تازالاۋ كەرەك. سونداي- اق، ولار بالانىڭ ءتىس تازالاۋىن ەڭ بولماعاندا ول 8 جاسقا تولعانشا باقىلاۋ كەرەگىن ەسكەرتەدى. بالا تىسىندە ەرتە تىسجەگى پايدا بولۋىنىڭ ءبىر سەبەبى - ءجيى تۇندە ەمۋ. ەگەر بالاڭىز تۇندە ەمۋىن توقتاتپاسا، ءتىس جەگىنىڭ الدىن الۋ ءۇشىن وعان ءار ەمىزگەننەن كەيىن بوتەلكەمەن سۋ ىشكىزىپ جىبەرگەن ءجون.

3. چەتكا جۇمساق بولۋى كەرەك

بالانىڭ ءتىس شەتكاسىنا قويىلاتىن نەگىزگى تالاپتاردىڭ ءبىرى — جۇمساق قىلتان. ەگەر گيگيەناعا قاجەتتى ۋاقىت (2 مينۋتتان از ەمەس) بولسەڭىز جانە دۇرىس تەحنيكانى (جوعارىدان تومەن قاراي قوزعاۋ) ساقتاساڭىز، جۇمساق شەتكانىڭ وڭەزدەن ارىلۋعا كۇشى جەتەدى. مۇنداي شەتكانىڭ باستى ارتىقشىلىعى — ونىڭ بالا ءتىسىنىڭ ەتىن زاقىمداماۋى. ستوماتولوگتار ساۋساققا كيەتىن سيليكون ءتىس تازالاعىشتاردى تەك جولدا پايدالانۋعا كەڭەس بەرەدى. سەبەبى ولار شەتكا سەكىلدى ءتىستى تولىق تازالاي المايدى. 3 جاستان اسقان بالالارعا ءتىس تازالايتىن ەلەكتر شەتكا الىپ بەرۋگە بولادى. ءجيى مۇنداي شەتكاعا قىزىققان بالا ءتىسىن وزدىگىنەن تازالاعىسى كەلىپ تۇرادى.

4. ءسۇت تىستەرىنىڭ ساپاسى تاماقتانۋعا بايلانىستى

ءسۇت تىستەرىنىڭ مينەرالدانۋى — بالا راتسيونى ۇلكەن ءرول اتقاراتىن كۇردەلى ءارى ۇزاق پروتسەسس. ستوماتولوگتاردىڭ ايتۋىنشا، بالاعا العاشقى تاماق (شامامەن 6 ايدان باستاپ) بەرگەننەن باستاپ، تەكستۋراسى، ءتۇسى جانە قۇرامىنداعى قورەكتىك زاتتار جيىنتىعى ءارتۇرلى ونىمدەر ۇسىنۋ كەرەك. اسىرەسە، بالاعا ءسابىز، توقاش، الما جانە باسقا دا «قيىن» ونىمدەردى ءمۇجۋدى ۇيرەتۋ كەرەك. ول جاق بۇلشىقەتتەرىنىڭ دامۋىن ىنتالاندىرادى، ءەمالدى مەحانيكالىق تۇردە تازارتادى جانە ونىڭ مينەرالدانۋىنا ىقپال ەتەدى. بالا راتسيونىندا ەڭ بولماعاندا 2 جاسقا دەيىن ءتاتتى مۇلدەم بولماۋ كەرەك.

5. سۋ بالانىڭ نەگىزگى سۋسىنى بولۋى ءتيىس

بالاعا ءتىس جەگىنىڭ ەرتە پايدا بولۋى — قازىرگى زاماننىڭ ناعىز پروبلەماسى. ماماندار ونى بالا راتسيونىندا سۋدىڭ جەتىسپەۋشىلىگىمەن دە بايلانىستىرادى. قازىر كوپشىلىك ءار تاماقتانۋ كەزىندە بالاعا ءتاتتى سۋسىندار بەرەدى، بارلىق مۇمكىن تىسكەباسارلار قولجەتىمدى — مۇنىڭ بارلىعى ءتىس جەگىنى تۋدىراتىن باكتەريالاردىڭ دامۋىنا كەرەمەت ورتا. بۇل ميكرواعزالار قىشقىل ورتانى جاقسى كورەدى، ال قىشقىل ورتا كەز كەلگەن تاماقتانۋدان سوڭ جانە ءتاتتى سۋسىندار ىشكەننەن كەيىن پايدا بولادى. ولار سىلەكەيمەن ىلعالدانعان جانە قاراپايىم سۋمەن شايىلعان ورتانى جاقتىرمايدى. سوندىقتان تازا سۋ ءىشۋ — ءتىس جەگىدەن قورعانۋدىڭ كەرەمەت ءادىسى.

6. ءتىس دارىگەرىنە جۇيەلى تۇردە قارالاپ تۇرۋ كەرەك

بالانى ءتىس دارىگەرىنە العاش رەت 9-12 ايىندا قاراتۋ ۇسىنىلادى. بۇل كەزدە بالا بىرنەشە تىسىمەن ماقتانا الادى. ال دارىگەر سول تىستەرىن قاراپ، گيگيەنا جايىندا كەڭەس بەرىپ، ءتىس جەگىنىڭ الدىن الۋ شارالارىن ۇسىنادى.

massaget.kz