سولتۇستىك قازاقستانداعى كولدەردە بالىق قىرىلىپ جاتىر

س ق و ەكولوگيا دەپارتامەنتى ءوڭىر كولدەرىندە بالىقتىڭ قىرىلۋ دەرەگىن الەۋمەتتىك جەلىلەرگە مونيتورينگ جۇرگىزۋ بارىسىندا انىقتاعان. مامانداردىڭ ايتۋىنشا، قىزىلجار اۋدانى پرەسنوۆكا اۋىلىنىڭ ماڭىنداعى پرۋد كولىندە 150 ك گ موڭكە بالىعى ولگەن. سۋ قويماسى ەشكىمگە جالعا بەرىلمەگەن، بالىق شارۋاشىلىعى سۋ ايدىندارىنىڭ رەزەرۆتىك قورىنا الىنعان ەكەن.
بالىقتىڭ قىرىلۋ سەبەبىن انىقتاۋ ءۇشىن ەكولوگتار، ەسىل وبلىسارالىق باسسەيندىك بالىق شارۋاشىلىعى ينسپەكسياسى، س ق و اكىمدىگىنىڭ تابيعي رەسۋرستار جانە تابيعات پايدالانۋدى رەتتەۋ باسقارماسى، قىزىلجار اۋدانىنىڭ ۆەتەريناريالىق قىزمەتى ماماندارى اتتاندى. زەرتحانالىق تالداۋ جۇرگىزۋ ماقساتىندا كول سۋىنىڭ جانە بالىق ۇشاسىنىڭ سىنامالارى الىندى. ال اۋىلدىق وكرۋگ اكىمدىگى قازىرگى ۋاقىتتا كولدى ولگەن بالىقتان تازارتىپ جاتىر.
ايىرتاۋ اۋدانى ارىقبالىق اۋىلىنىڭ ماڭىندا ورنالاسقان لوگوۆوە كولىندە دە ولگەن موڭكە بالىعى سۋ بەتىنە قالقىپ شىققان. مۇندا دا ءتيىستى سىنامالار الىندى. بۇگىن الەۋمەتتىك جەلىدە پەتروپاۆل ماڭىنداعى پەستروە كولىندە دە بالىقتىڭ ولگەن بەينەجازباسى جاريالاندى. بۇعان دەيىن تايىنشا اۋدانى تەڭدىك اۋىلىنىڭ ماڭىنداعى چاگلينكا وزەنىندە بالىق قىرىلدى. بۇل سۋ ايدىنى، ەكولوگتاردىڭ ايتۋىنشا، جەرگىلىكتى ماڭىزى بار بالىق شارۋاشىلىعى سۋ ايدىندارىنىڭ تىزبەسىنە ەنگىزىلمەگەن. ەستەرىڭىزگە سالايىق، قىزىلجار اۋدانى بۋگروۆوە كولىندە دە موڭكە بالىعى قىرىلعان بولاتىن. ماماندار بالىقتىڭ نەدەن ولگەنىن انىقتاۋ ماقساتىندا ءتيىستى ساراپتامالاردى جۇرگىزدى. ناتيجەسى تەك 5 كۇننەن كەيىن عانا بەلگىلى بولماق. الدىن الا بولجام بويىنشا، بالىق اۋا جەتپەي قىرىلعان.