تۇركىستان وبلىسىندا مەملەكەتتىك قىزمەتكەرلەر جەتىسپەيدى

ماسەلە بۇگىن مەملەكەتتىك قىزمەت ىستەرى اگەنتتىگىنىڭ ءتوراعاسى دارحان جازىقبايەۆتىڭ وڭىرگە ساپارى بارىسىندا تالقىلاندى، دەپ حابارلايدى قازاقپارات ءتىلشىسى.
سارىاعاش اۋدانىندا ءاربىر مەملەكەتتىك قىزمەتكەرگە مىڭعا جۋىق تۇرعىننان كەلەدى. ال، ارىس قالاسىندا 44 مىڭ ادامعا 7 مەملەكەتتىك قىزمەتكەر عانا بولىنگەن، ونىڭ تورتەۋى ءبىر جىلدان اسا ۋاقىتتان بەرى ۋاقىتشا قىزمەتىنەن شەتتەتىلگەن.
جەتىساي اۋدانىندا 45 مىڭعا تارتا وقۋشى مەن جۇزدەن اسا مەكتەپ بولسا، ءبىلىم بولىمىندە نەبارى 3 مەملەكەتتىك قىزمەتكەر جۇمىس ىستەيدى. دارحان جازىقبايەۆ بۇل پروبلەمالار قازىر اگەنتتىك تاراپىنان قارالىپ جاتقانىن جەتكىزدى. ول سونداي-اق، قازىرگى جۇرگىزىلىپ جاتقان رەفورمالاردى وڭتايلى جۇزەگە اسىرۋ بارىسىن بايانداپ، كورسەتىلەتىن مەملەكەتتىك قىزمەتتەردىڭ ءتيىمدى ءارى ساپالى جۇزەگە اسىرۋ قاجەتتىلىگىن العا تارتتى.
مەملەكەتتىك قىزمەتكە ىرىكتەۋدى جەڭىلدەتۋ بويىنشا جاسالىپ جاتقان ءبىرقاتار ۇسىنىستارعا توقتالدى. سونداي-اق، تۇركىستان، كەنتاۋ قالالارىندا جانە ورداباسى اۋدانىندا جەكە قابىلداۋلار وتكىزىپ، ازاماتتاردىڭ ارىز-شاعىمدارى مەن تالاپ-تىلەكتەرىن تىڭدادى.
قوجا-احمەت ياسساۋي اتىنداعى حالىقارالىق قازاق-تۇرىك ۋنيۆەرسيتەتىنىڭ وقىتۋشى، پروفەسسورلار قۇرامىمەن جانە جاس مەملەكەتتىك قىزمەتشىلەر مەكتەبىنىڭ ستۋدەنتتەرىمەن كەزدەستى.
جاستارعا مەملەكەتتىك قىزمەتكە ورنالاسۋدىڭ جولدارىن ءتۇسىندىرىپ، بولاشاقتا ولاردىڭ الەۋمەتتىك جاعدايى جاقسارىپ، جالاقىلارى ءوسۋى مۇمكىن ەكەنىن جەتكىزدى.
ايتا كەتەيىك، تۇركىستان وبلىسىنداعى قازىرگى مەملەكەتتىك قىزمەتشىلەردىڭ 500 دەن استامى - وسى وقۋ ورىننىڭ تۇلەكتەرى.
ەسكە سالساق، دارحان جازىقبايەۆ قوعامدىق كەڭەستىڭ جاڭارتىلعان قۇرامىنىڭ العاشقى رەسمي كەزدەسۋىندە مەملەكەتتىك قىزمەتكە كادرلاردى ىرىكتەۋ كەزىندە ۇمىتكەردىڭ ءارتۇرلى قىرلارىن قامتيتىن باعالاۋ جۇيەسى كەرەكتىگىن ءمالىم ەتكەن.