قازاقستاندا التىن قۇيماعا سۇرانىس ارتتى - ۇلتتىق بانك

بۇل تۋرالى ۇلتتىق بانك ءمالىم ەتتى، - دەپ حابارلايدى Tengrinews.kz ءتىلشىسى.
«2022-جىلعى ناۋرىزدا ەكىنشى دەڭگەيلى بانكتەر مەن جەكەلەگەن بانكتىك ەمەس ايىرباستاۋ پۋنكتتەرى جالپى سالماعى 167,2 كەلى 8269 قۇيما ساتتى، بۇل 2021-جىلدىڭ وسى كەزەڭىمەن سالىستىرعاندا 3 ەسە كوپ (سالماعى 48,2 كەلى 2898 قۇيما).
ساتىلىمنىڭ ۇلعايۋىنا التىنعا ينۆەستيتسيا قۇيۋعا قىزىعۋشىلىعى ارتقان حالىقتىڭ سۇرانىسى ىقپال ەتىپ وتىر. سەبەبى قارجى نارىعىنداعى بەلگىسىزدىك پەن ۆاليۋتا باعامى قۇبىلمالى بولىپ تۇرعان شاقتا كوپشىلىك بۇعان جيناقتارىنىڭ ساقتالۋىن قامتاماسىز ەتۋدىڭ بالامالى قۇرالى رەتىندە قارايدى»، - دەلىنگەن حابارلامادا.
حالىققا تازارتىلعان التىن قۇيمالاردى ساتۋ جانە ساتىپ الۋ باعدارلاماسىن ۇلتتىق بانك 2017-جىلى ىسكە قوسقانى ايتىلدى. باعدارلاما قولعا الىنعالى جالپى سالماعى 3 تونناعا جۋىق 87531 التىن قۇيما ساتىلعان.
التىن قۇيمالار بەس ءتۇرلى سالماقتا ۇسىنىلادى: 5، 10، 20، 50 جانە 100 گرام.
«ساتىپ الۋشىلار اراسىندا وتە جوعارى سۇرانىسقا يە ءتۇرى - 10 گرامدىق قۇيما. جالپى ساتىلعان قۇيمالار اراسىندا ونىڭ ۇلەسى - 27 پايىز، ياعني، 23390 دانا. ودان كەيىن 20 گرامدىق قۇيما سۇرانىسقا يە، 18178 دانا (21 پايىز)، 100 گرامدىق قۇيمادان 18034 دانا (20 پايىز)، 5 گرامدىق قۇيمادان 16834 دانا (19 پايىز)، 50 گرامدىق قۇيمادان 11095 دانا (13 پايىز) ساتىلدى. التىن قۇيمالار الماتى، نۇر-سۇلتان جانە اتىراۋ قالالارىندا كوپ ساتىلادى»، - دەدى ۇ ب وكىلدەرى.
التىن قۇيمالار سەنىمدى ينۆەستيتسيا قۇرالى بولا الادى. التىن قۇيمالار نارىعىنداعى وتىمدىلىكتىڭ باستى كەپىلى - بانك پەن بانكتىك ەمەس ايىرباستاۋ پۋنكتتەرى كليەنتكە اقشانى سول كۇنى تولەي وتىرىپ، التىن قۇيمالاردى كەرى ساتىپ الا الادى. باعدارلاما باستالعاننان بەرى ەكىنشى دەڭگەيلى بانكتەر مەن جەكەلەگەن بانكتىك ەمەس پۋنكتتەر جالپى سالماعى 303,3 كەلى 12367 التىن قۇيمانى كەرى ساتىپ العان، بۇل - جالپى ساتىلعان التىن قۇيمالاردىڭ 14 پايىزى. ولار كەرى ساتىپ العان التىن قۇيمالاردىڭ بارلىعى ۇلتتىق بانكتىڭ فيليالدارى ارقىلى حالىققا ساتىلادى.