ۇلتتىق قۇرىلتايدا رۋحاني ماسەلەنى قاراۋ كەرەك - ەدىل جاڭبىرشين

نۇر- سۇلتان. قازاقپارات - ۇلتتىق قۇرىلتايدا كەنجە قالعان رۋحاني ماسەلەنى قاراۋ كەرەك. بۇل تۋرالى «ۇلتتىق قۇرىلتاي - قوعامدىق ديالوگتىڭ جاڭا مودەلى» اتتى «Sarap» ەكسپەرتتىك كلۋبىنىڭ وتىرىسىندا ءماجىلىس دەپۋتاتى ەدىل جاڭبىرشين ءمالىم ەتتى، دەپ حابارلايدى قازاقپارات ءتىلشىسى.
None
None

«پرەزيدەنت ءوزىنىڭ جولداۋىندا قۇرىلتايدى قۇرۋ جونىندە ماسەلە كوتەردى. شىنىندا دا ۇلتتىق قوعامدىق سەنىم كەڭەسى بەلگىلى ءبىر دارەجەدە ءبىراز شارۋانى اتقاردى. ەندى وسى كەڭەستىڭ ورنىنا قۇرىلتايدى قۇرۋ جونىندەگى ماسەلە تالقىلانىپ جاتىر. قۇرىلتاي نە ءۇشىن كەرەك؟ مەنىڭ ويىمشا، ول ءبىزدىڭ تاريحىمىزدا بار، ياعني مەملەكەت ءۇشىن وتە ماڭىزدى ماسەلەلەر قارالاتىن كەزدە، ونى ەل بولىپ شەشەتىن كەزدە حالقىمىز قۇرىلتاي جينايدى. ۇلكەن قۇرىلتايدىڭ نەگىزىندە حالىقپەن بىرلەسىپ، ورتاق ماملەگە كەلىپ، جاھاندىق ماسەلەلەرگە شەشىم جاسالعان»، - دەدى ە. جاڭبىرشين.

وسى ورايدا ول قوعامدا اۋقىمدى ترانسفورماتسيالار بولىپ جاتقانىن ايتتى.


«كەشەگى قاڭتار وقيعاسىنان كەيىن حالىق قازاقستاننىڭ دامۋىنا ەكپىن قويىپ وتىر. نەگىزى، 30 -جىل بويى قوردالانىپ قالعان ساياسي- ەكونوميكالىق، الەۋمەتتىك ماسەلەلەر بار. قاڭتاردا قاراپايىم حالىقپەن دە، ەلدىڭ ورتاسىندا جۇرگەن اقساقالمەن دە، ساياسي تۇلعالارمەن دە كەزدەسكەن كەزدە بارلىعى وزگەرىستەردى تالاپ ەتتى. سوندىقتان وسىنىڭ بارلىعىن ەل دە، حالىق تا، بيلىك تە جاقسى ءتۇسىنىپ وتىر»، - دەدى دەپۋتات.

بۇل تۇرعىدا ول «حالىق ۇنىنە قۇلاق اساتىن مەملەكەت» تۇجىرىمداماسىنىڭ ماڭىزدىلىعىن اتاپ ءوتتى.

«قۇرىلتايدى قۇرۋ ءۇشىن ماڭىزدى ماسەلەلەردى ايقىنداپ الۋ كەرەك. بىرىنشىدەن، ونىڭ ماقساتى قانداي؟ ەكىنشىدەن، ونىڭ مىندەتتەرى قانداي بولادى؟ ءبىز قۇزىرەتتەردى قايتالاماۋىمىز كەرەك. ۇشىنشىدەن، ونىڭ سانى مەن ساپاسى قالاي بولادى؟ تورتىنشىدەن، كۇن تارتىبىنە قانداي ماسەلەلەردى ەنگىزەمىز؟ بەسىنشىدەن، قۇرىلتاي جيىنىن وتكىزۋ مەرزىمى دە ماڭىزدى. سوندىقتان وسىنداي ءىرى ماسەلەلەردى شەشىپ الۋ قاجەت. قۇرىلتايدىڭ ەڭ باستى ماقساتى - قازاقستان حالقىنا قاجەتتى تاقىرىپتاردى كۇن تارتىبىنە شىعارۋ. وسى قۇرىلتاي بىزدە كەنجە قالعان رۋحاني ماسەلەنى قاراۋ كەرەك دەپ سانايمىن. سەبەبى ءبىزدىڭ مەملەكەتىمىزدىڭ ۇيىتقىسى - ۇلتتىق يدەولوگيامىز. سول ماسەلە ءالى كۇنگە دەيىن شەشىلمەي كەلە جاتىر. وسى ماسەلەلەر قامتىلماسا، ساياسات تا، ەكونوميكا دا، الەۋمەتتىك ماسەلە دە ءوز دەڭگەيىندە شەشىلمەيدى، سونداي- اق ادىلەتتى قوعامدى دا قۇرا المايمىز»، - دەدى ەدىل جاڭبىرشين.

ەسكە سالا كەتەيىك، بيىل ناۋرىز ايىنداعى جولداۋىندا مەملەكەت باسشىسى قاسىم- جلمارت توقايەۆ ۇلتتىق قۇرىلتاي قۇرۋدى ۇسىندى.


سوڭعى جاڭالىقتار