16:20, 21 - ءساۋىر 2022 | GMT +5
الماتىدا ەكى جىگىت بويجەتكەندى كولىككە كۇشتەپ وتىرعىزىپ الىپ كەتتى
الماتى. قازاقپارات - الماتىدا ەكى جىگىت بويجەتكەندى كۇشتەپ، كولىككە مىنگىزىپ الىپ قاشتى. وقيعانىڭ ۆيدەوسى الەۋمەتتىك جەلىدە تارادى، دەپ حابارلايدى قازاقپارات ءتىلشىسى.

الماتى قالالىق پوليسيا دەپارتامەنتى اتالمىش وقيعا بويىنشا ەشقانداي حابار، ءوتىنىش تۇسپەگەنىن ءمالىم ەتتى.
«الاتاۋ اۋداندىق پوليسيا باسقارماسى جانىنداعى پوليتسيا ءبولىمىنىڭ مالىمەتىنشە، بولعان وقيعا تۋرالى 102 پۋلتىنە سيگنال، وتىنىشتەر تۇسكەن جوق. قازىرگى ۋاقىتتا ءمان- جايلاردى انىقتاۋ ءۇشىن جەدەل بولىمشە تەكسەرۋ ءىس- شارالارىن جۇرگىزۋدە. تاجىريبەگە سۇيەنسەك، بۇل پرانك نەمەسە قانداي دا ءبىر شىعارماشىلىق ءونىمنىڭ ءتۇسىرىلىمى بولۋى مۇمكىن. قالاي بولعاندا دا، تەكسەرۋ شارالارى ءجۇرىپ جاتىر»، - دەدى قالالىق پوليسيا دەپارتامەنتىنىڭ باسپا ءسوز حاتشىسى سالتانات ازىربەك.
ايتا كەتەيىك، ق ر قىلمىستىق كودەكسىنىڭ 125-بابى «ادامدى ۇرلاۋ» بويىنشا قىلمىس جاساعان ادامعا ءتورت جىلدان جەتى جىلعا دەيىنگى مەرزىمگە باس بوستاندىعىنان ايىرۋ جازاسى كوزدەلگەن.