الماتىدا جالعا بەرىلەتىن پاتەر باعاسى شارىقتاپ كەتتى

وسىعان وراي الماتى قالاسىندا جالعا بەرىلەتىن باسپانانىڭ باعاسى تاعى قىمباتتادى، دەپ حابارلايدى قازاقپارات ءتىلشىسى.
احمەتوۆتار وتباسىنىڭ الماتىدا پاتەر جالداپ تۇرىپ جاتقاندارىنا 15 جىل بولعان. وتاعاسى تاكسي جۇرگىزۋشىسى بولىپ جۇمىس ىستەيدى، جارى جۇلدىز ەكى بالاسىمەن ءۇي شارۋاسىندا. ۇلكەن ۇلى - مۇگەدەك.
«باسپانعا كەزەكتە تۇر. جالعا الاتىن پاتەردىڭ 50 پايىزىن مەملەكەت تولەپ بەرەدى»، - دەگەن جاڭالىقتى ەستىگەن ولار قاتتى قۋاندى. الايدا ول قۋانىشتارى ۇزاققا سوزىلمادى.
«ءبىز جالعا بەرىلەتىن تۇرعىن ءۇيدى سۋبسيديالاۋعا جاتاتىن ءتورت ساناتتىڭ ىشىندەمىز. مۇگەدەك بالامىز بار. 15 جىل بولدى، پاتەردى قالا سىرتىنان جالداپ كەلەمىز. سەبەبى ءسال بولسا دا ارزان. ەندى مامىردان باستاپ مەملەكەت ۇلكەن قولداۋ كورسەتپەكشى. وعان قاتتى قۋاندىق، الايدا قۋانىشىمىز ۇزاققا سوزىلمادى. ءبىر اپتا بولدى، الماتىدان ەكى بولمەلى پاتەر ىزدەپ جۇرگەنىمە. باعاسى شارىقتاپ كەتكەن. 200-220 مىڭ تەڭگەنىڭ توڭىرەگىندە. ونىڭ جارتى باعاسىنىڭ ءوزى بىزگە ۇلكەن سالماق»، - دەيدى جۇلدىز احمەتوۆا.
ول «وتباسى بانك» ا ق-نان ءوتىنىم بەرۋ پروتسەسىن تەستىلەۋگە قاتىسۋ تۋرالى SMS- شاقىرتۋ العانىن دا تىلگە تيەك ەتتى.
«مەنىڭ ويىمشا، جالعا بەرىلەتىن پاتەر باعاسىن باقىلاۋ قاجەت. بۇل مۇمكىندىكتى پاتەر يەلەرى جىبەرمەيتىنى انىق. اپتانىڭ باسىندا مەنىڭ تەلەفونىما SMS- شاقىرتۋ كەلدى»، - دەيدى ول.
ريەلتور كارىم شۋحراتوۆ جالعا بەرىلەتىن پاتەرلەردىڭ باعاسى كۇرت قىمباتتاپ كەتكەنىن ايتتى.
«الەۋمەتتىك وسال توپتار ءۇشىن پاتەر جالداۋعا ارنالعان سۋبسيديا بەرىلەتىنىن ەستىگەن ءۇي يەلەرى باعانى كوتەرىپ تاستادى. سۇرانىس كوبەيە باستادى. بۇرىن ءبىر بولمەلى پاتەر 110-130 مىڭ تەڭگە ارالىعىندا بولسا، قازىر 160-180 مىڭ تەڭگە سۇرايدى. مەن ورتاشا باعاسىن ايتىپ تۇرمىن. قالانىڭ جوعارى بولىگىندە 500 مىڭ تەڭگەگە وتكىزەتىندەر دە بار»، - دەيدى كارىم شۋحراتوۆ.
رەلتورلاردىڭ سوزىنشە، جىل سايىن بەلگىلى ءبىر مەجەگە دەيىن وسەتىن جالعا بەرۋ اقىسى ەشقاشان تومەندەمەيدى. ماسەلەنى مەملەكەتتىك دەڭگەيدە رەتتەيتىن كەز كەلدى.
ايتا كەتەيىك، جالعا بەرىلەتىن تۇرعىن ءۇيدى سۋبسيديالاۋعا ءوتىنىم قابىلداۋ باستالدى. ەسكە سالساق، قازاقستاندا 70 مىڭنان استام وتباسى تۇرعىن ءۇي جالداۋ اقىسىنا سۋبسيديا الادى.