سەنات ءتوراعاسى اشىمبايەۆ مەملەكەتتىك قارىزدىڭ وسۋىنە الاڭداۋشىلىق ءبىلدىردى

جۋرناليستەر سۇراعىنا جاۋاپ بەرگەن سەنات سپيكەرى مەملەكەتتىك قارىزدىڭ وسۋىنە الاڭداۋشىلىق ءبىلدىردى.
«بۇل وتە كۇردەلى ماسەلە. وسى جەردە بۇرىننان جۇمىس ىستەيتىن جۋرناليستەر بىلەدى، بىلتىر مەملەكەت قارىزى بويىنشا بۇل ماسەلەنى كوتەرگەنبىز، ونىڭ وسكەنىن سىناعان ەدىك. سودان كەيىن ۇكىمەت جاعدايدى باقىلاۋعا الۋعا ۋادە بەردى، قازىر بيۋدجەت اياسىندا، ارينە، بۇل مەملەكەتتىك قارىز ماسەلەسىن تاعى دا قاراستىرامىز»، - دەدى اشىمبايەۆ سەنات وتىرىسىندا.
بۇدان بولەك، جۋرناليستەر سەناتورلار ۇكىمەتتەن ۇلتتىق قوردان بولىنەتىن قارجى كولەمىن ازايتۋدى سۇراي ما دەگەن ساۋال قويدى.
«قازىر ايتۋ قيىن. ونى كەشە عانا ماجىلىستەگى ارىپتەستەرىمىز قارادى، بۇگىن بيۋدجەت جوباسىن الۋىمىز كەرەك، ونى زەردەلەيمىز، مۇقيات قارايمىز، سۇراقتار تۋىنداسا، ارينە، كوتەرەمىز، ۇكىمەت وكىلدەرىمەن سويلەسەمىز. قانداي ماسەلەلەر، ناقتىراق ايتساق، نە تۋرالى سويلەسەتىنىمىز تۋرالى پىكىر ايتۋعا ءالى ەرتە، قۇجاتپەن كەم دەگەندە ءبىر اپتا جۇمىس ىستەيىك»، - دەپ جاۋاپ بەردى ماۋلەن اشىمبايەۆ.
Tengrinews.kz