پاۆلودارداعى ورتتەن كەيىن ءبىلىم مينيسترلىگى بارلىق مەكتەپتەردى تەكسەرەدى

«مۇنىڭ ءبىرىنشى جاعداي ەمەستىگىن ايتۋ كەرەك. سوندىقتان ءبىز بارلىق وقىتۋ ۇيىمدارىنا تولىق تەكسەرۋ جۇرگىزۋدى تاپسىردىق. سەبەبى ورتكە قارسى شارالار ساقتالۋى ءتيىس. مەكتەپ پايدالانۋعا بەرىلگەندە، جوندەۋدەن كەيىن جانە جاڭا وقۋ جىلى باستالار الدىندا مىندەتتى تۇردە اكتىلەر بولۋى كەرەك. ونىڭ ىشىندە ورتكە قارسى قىزمەتتەردەن دە بولۋى قاجەت. سوندىقتان، مەنىڭ ويىمشا، مۇنداي انىقتامالار مەن اكتىلەر بولدى، ەندى ءورتتىڭ نەدەن تۋىنداعانىن ءبىلۋ ءۇشىن تەرگەۋ جۇرگىزىلەتىن بولادى. مەندە بار اقپاراتقا سايكەس، كۇيىك العاندار مەن زارداپ شەككەندەر جوق. تەك ءبىر ءمۇعالىم وسى جاعدايعا بايلانىستى پسيحولوگيالىق پروبلەماعا ۇشىرادى. وعان پسيحولوگيالىق كومەك كورسەتىلىپ جاتىر»، - دەدى اسحات ايماعامبەتوۆ سەناتتا تىلشىلەرگە بەرگەن سۇحباتىندا. سونىمەن بىرگە، ءبىلىم ءمينيسترى وقۋشىلاردىڭ ساباقتى قالاي جالعاستىراتىنىن ايتىپ بەردى. «قازىر عيماراتتىڭ وزىنە تولىق تەكسەرۋ جۇرگىزىلەدى. ءتيىستى قىزمەتتەر ءورتتىڭ سەبەبىن انىقتايدى. ەگەر ءارى قاراي وقۋعا ەش قاۋىپ بولماسا، بالالار وقۋىن جالعاستىرا الادى. ازىرگە ولار ۋاقىتشا قاشىقتان وقي الادى. ال عيماراتتىڭ جارامسىز ەكەنى انىقتالسا، اكىمدىك بۇل بالالاردىڭ وقۋىن باسقا ۇيىمداردا جالعاستىرۋ شارالارىن قاراستىرادى»، - دەدى ا. ايماعامبەتوۆ.
ەسكە سالا كەتسەك، بۇگىن تاڭەرتەڭ پاۆلودارداعى №28-مەكتەپتىڭ 200 شارشى مەتر اۋماعى ورتەنىپ كەتتى. مەكتەپتەن 576 ادام، ونىڭ ىشىندە 551 بالا ەۆاكۋاتسيالاندى.
اۆتور: ايجان سەرىكجان قىزى