ەلوردادا قانداي نىسىندار بوي كوتەرەتىنى بەلگىلى بولدى

وسى باعىتتا اكىمدىك قىزمەتكەرلەرىمەن، ونىڭ ىشىندە اۋداندىق اكىمدىكتەرمەن جانە قۇرىلىس سالۋشىلارمەن كەزدەسۋلەر، تالقىلاۋلار وتپەك.
«ايتا كەتۋ كەرەك، قابىلدانعان شەشىمدەر تەك نۇكتەلى قۇرىلىس تۋرالى ماسەلە قوزعالعاندا عانا قايتا قارالادى. سەبەبى قالانىڭ باس جوسپارىنا سايكەس ىقشام قۇرىلىسقا رۇقسات ەتىلەدى. سوندىقتان الەۋمەتتىك نىساندار مەن قوعامدىق كەڭىستىكتەر تاپشىلىعى بار اۋماقتاردا تۇرعىن ءۇي كەشەنىن سالۋ تۋرالى قۇرىلىس سالۋشىلاردىڭ ۇسىنىسى قابىلدانعان جوق»، - دەپ جازدى ەلوردا اكىمدىگىنىڭ رەسمي سايتى.
ونداعى دەرەكتەرگە سۇيەنسەك، قالاداعى بايتۇرسىنوۆ كوشەسى، 7 جەر ۋچاسكەسىندە كوپپاتەرلى تۇرعىن ءۇي كەشەنىنىڭ ورنىنا مەكتەپ سالىنادى. بۇدان بولەك، قوشقاربايەۆ داڭعىلى مەن اقىرتاس كوشەسى ماڭىندا وقۋشى ورىندارىنىڭ تاپشىلىعىن ازايتۋ ءۇشىن جالپى ءبىلىم بەرەتىن تاعى ءبىر مەكتەپ سالىنادى.
سول سياقتى، اقبۇلاق ىقشاماۋدانىنداعى ق. جالايىر كوشەسىندە «Iconic» تۇرعىن ءۇي كەشەنىنىڭ قۇرىلىسى توقتاتىلعان. وندا ماستەر-جوسپار بويىنشا گۇلزار سالىنادى.
«ەسىل اۋدانى بويىنشا ماڭگىلىك ەل داڭعىلىنداعى №9-ەمحانا مەن №77-مەكتەپ- گيمنازيا اراسىنداعى ۋچاسكەدە سەرۋەندەۋ جانە دەمالۋ ءۇشىن قوعامدىق كەڭىستىك اشىلادى. كۇمىسبەكوۆ كوشەسى، 9-مەكەنجايىنداعى 21-قاباتتى تۇرعىن ءۇي كەشەنى مەن پاركينگتىڭ ورنىنا قوعامدىق كەڭىستىك پەن گۇلزار سالىنادى. م. گوركي - كوسىگين - چەليۋسكينسەۆ - يشيمسكايا كوشەلەرىنىڭ كۆادراتىندا تۇرعىن ءۇي كەشەنىنىڭ ورنىنا گۇلزار پايدا بولادى. سونىمەن قاتار، باس پروكۋراتۋرا مەن Jysan Bank عيماراتتارى اراسىنداعى ماڭگىلىك ەل داڭعىلى مەن سىعاناق كوشەسىنىڭ قيىلىسىندا ورنالاسقان اۋماقتا كوپپاتەرلى تۇرعىن ءۇي كەشەنىنىڭ ورنىنا تاعى ءبىر مەكتەپ تۇرعىزىلادى»، - دەلىنگەن حابارلامادا.
جاريالانىمدا ەلوردانىڭ جەلىلىك پاركىندە تۇرعىن ءۇي قۇرىلىسى بولمايتىنى، ياعني «ابۋ دابي پلازادان» باستاپ بوتانيكالىق باققا دەيىن جەلىلىك پاركتىڭ بارلىق تۇسىندا كوپپاتەرلى تۇرعىن ءۇي كەشەنى سالىنبايتىنى ايتىلعان.
«Caspian Palace» ت ك مەن «Palazzo degli Affari» بيزنەس ورتالىعى اراسىنداعى اۋماقتا سىعاناق، ءا. بوكەيحان، كەرەي-جانىبەك حاندار كوشەلەرى جانە ماڭگىلىك ەل داڭعىلى كۆادراتىنداعى «قالالىق رومانس» ت ك ماڭىندا بۇرىن جوسپارلانعان قۇرىلىستىڭ ورنىنا مەكتەپ بولادى. جەر - قۇرىلىس سالۋشىنىڭ جەكە مەنشىگى.
«بۇقار جىراۋ جانە ءا. بوكەيحان كوشەلەرىنىڭ قيىلىسىنداعى اقنيەت كوشەسىنىڭ بويىندا جالپى ءبىلىم بەرەتىن مەكتەپ، بالاباقشا مەن بۋلۆار ورنالاستىرۋ قاراستىرىلعان. جەر - قۇرىلىس سالۋشىنىڭ جەكەمەنشىگى، بۇرىن تۇرعىن ءۇي كەشەنىنىڭ قۇرىلىسى جوسپارلانعان. قابانباي باتىر داڭعىلىنداعى كەرەي، جانىبەك حاندار جانە ورىنبور كوشەلەرىنىڭ اراسىنا مەديتسينالىق ورتالىق سالىنادى. جوعارىدا اتالعان بارلىق جوبالار بويىنشا ەگجەي-تەگجەيلى جوسپارلاۋ جوباسىنا وزگەرىستەر ەنگىزۋ بويىنشا اكىمشىلىك پروتسەستەر جۇرگىزىلىپ جاتىر»، - دەپ اتاپ وتكەن اكىمدىك.