الەمدە كوروناۆيرۋس قايتا ءورشىپ بارادى

«رەيتەر» اگەنتتىگىنىڭ حابارلاۋىنشا، وڭتۇستىك كورەيا، يتاليا، جاڭا زەلانديا مەن مالايزيادا جۇقتىرۋ دەرەگى كوبەيگەن، دەپ حابارلايدى «حابار 24».
مىسالى، قىتايدا سوڭعى مالىمە بويىنشا 2753 ادام ىندەت جۇقتىرعان. تاعى 17 مىڭنان استامى كوۆيدتىڭ سيمپتومسىز تۇرىنە شالدىققان. بۇل تۋرالى وسى ەلدىڭ دەنساۋلىق جونىندەگى ۇلتتىق كوميسسياسى مالىمدەدى. ناۋقاستاردىڭ 90 پروتسەنتى شانحاي تۇرعىندارى. سونداي-اق بۇل شاھاردا 7 ادام كوز جۇمعانى حابارلاندى. اۋرۋحانادا ءالى 236 ناۋقاس جاتىر.
«جاپپاي سكرينيڭ جۇرگىزۋ ارقىلى 3 دەڭگەيلى اۋماقتى ايقىندادىق. وسىعان سايكەس 16 مىڭنان استام اۋماق وقشاۋلانعان رەجيمدە. بۇل ايماق 12 ميلليونداي تۇرعىندى قامتيدى»، دەيدى شانحاي دەنساۋلىق ساقتاۋ كوميسسياسىنىڭ ينسپەكتورى ۋ سيانيۋي.
دجون حوپكينس ۋنيۆەرسيتەتى ا ق ش-تا جۇقتىرعاندار سانى 80 ميلليوننان اسقانىن حابارلادى. امەريكالىق ساراپشىلار كوروناۆيرۋس الداعى اپتالاردا باتىس جانە وڭتۇستىك ايماقتاردا ءورشيدى دەپ كۇتەدى. بۇعان وميكرون شتامىنىڭ سۋبۆاريانتىنىڭ تارالۋى سەبەپ. قازىردىڭ وزىندە نيۋ-يورك پەن نيۋ-دجەرسي شتاتتارىندا جۇقتىرۋ كورسەتكىشى 64 پروتسەنتكە ارتقان.
«كەيبىر ايماقتار مەن قالالاردا كوروناۆيرۋس جۇقتىرۋ كورسەتكىشىنىڭ قايتا وسكەنىن بايقاپ وتىرمىز. وميكروننىڭ سۋبۆاريانتى تەز تارالىپ جاتىر. ونى قازىرگىدەن دە كوپ ادام جۇقتىرۋى مۇمكىن»، دەيدى مەديتسينا پروفەسسورى پيتەر حوتەز .
الەمدە كوۆيد جۇقتىرعاندار سانى 500 ميلليون ادامنان استى. ال كوز جۇمعاندار قاتارى 6 ميلليون 190 مىڭعا جۋىق. بۇل دۇنيەجۇزىلىك دەنساۋلىق ساقتاۋ ۇيىمى تاراتقان سوڭعى مالىمەت. ماماندار ۆاكتسينا سالدىرماعاندار اراسىندا ءولىم-ءجىتىمنىڭ جوعارى ەكەندىگىن جانە وميكرون شتامىنىڭ باستى ورىنعا شىققانىن العا تارتادى. دۇنيەجۇزىلىك دەنساۋلىق ساقتاۋ ۇيىمى كوروناۆيرۋس تەستىسىن الۋ جيىگىلىن ازايتقان ەلدەردە ىندەتتىڭ ءورشۋ مۇمكىندىگى جوعارى دەپ ەسەپتەيدى.