تۇركيادا ازاماتتىق الۋ قىمباتتايدى

كۋرورتتىق ايماققا تەك ۋكراينادان ەمەس، رەسەي ازاماتتارى دا سوڭعى ايلاردا كوپتەپ قونىستانعان. تۇركيادا جىلجىمايتىن مۇلىك سوڭعى ءبىر جىلدا %96 قىمباتتادى. ورتالىق بانك وسىنداي مالىمدەمە جاسادى. پاتەر باعاسى ىستامبۇل، انكارا مەن يزمير قالالارىندا ايتارلىقتاي كوتەرىلگەن. ال سوڭعى بىرنەشە ايدا جاعالاۋدا ورنالاسقان شاھارلاردا باسپانانى جالعا بەرۋ باعاسى 3 ەسە ءوسىپتى. بۇعان ۋكراينا مەن رەسەيدەن كەلىپ جاتقان ازاماتتاردىڭ كوبەيۋى دەپ اسەر ەتىپ وتىر.
جاناسىل جۇبانيازوۆا، جىلجىمايتىن مۇلىك بويىنشا كەڭەسشى:
- كوپتەگەن ۇيدە قۇرىلىس جۇمىستارى توقتادى. شەتەل ازاماتتارىنىڭ كوپتەپ كوشىپ كەلۋىنە بايلانىستى سۇرانىس ارتتى. مۇناي باعاسى دا ءوستى. ياعني قۇرىلىس شىعىندارى كوبەيدى. سونىمەن قاتار ۋكراينا مەن رەسەي اراسىنداعى سوعىسقا بايلانىستى انتاليا مەن الانيا قالالارىنا كوپتەگەن يمميگرانتتار كەلدى. ولار ءۇي ساتىپ الىپ جاتىر. جالعا الىپ جاتىر. سوعان بايلانىستى باعا كوتەرىلدى.
تۇركيا بيلىگى جىلجىمايتىن مۇلىك ساتىپ الۋشى شەتەلدىكتەرگە ازاماتتىق الۋ باعاسىن 250 مىڭنان 400 مىڭ ا ق ش دوللارىنا دەيىن كوتەرۋگە نيەتتى. ساراپشىلاردىڭ ايتۋىنشا، بۇل دا پاتەر قۇنىن ودان ءارى شارىقتاتادى. ارينە، سىرتتان دوللاردىڭ كەلۋى ينۆەستيتسيا تۇرعىسىنان جاقسى. دەگەنمەن جالاقىسىن ليرامەن الاتىن جەرگىلىكتى تۇرعىندار ءۇشىن باعانىڭ ءوسۋى وڭايعا سوقپايتىنى انىق.
ەكرەم يورۋكوعلۋ، جىلجىمايتىن مۇلىك بويىنشا كەڭەسشى:
- تۇركيادا مامىر ايىنان باستاپ ازاماتتىق الۋ قىمباتتايدى. وسىعان بايلانىستى ءساۋىر ايىنىڭ سوڭىنا دەيىن كاداستر ورتالىقتارىندا كەزەك كوبەيەدى. بۇل دا ءوز كەزەگىندە ءۇي باعاسىنىڭ ارتۋىنا تۇرتكى بولىپ وتىر. ماسەلەن، ىستامبۇل، تاياۋ شىعىس ەلدەرىنىڭ تاڭداۋى بولسا، ديديم، فەتحيە مەن انتاليا رەسەيلىكتەردىڭ سۇرانىسىنا يە.
تۇركيا ورتالىق بانكىنىڭ مالىمەتىنشە، قازىر ىستامبۇلدا 120 شارشى مەتر بولاتىن ءۇي شامامەن 51 ميلليون تەڭگە تۇرادى. دەگەنمەن، باعا كوتەرىلسە دە، ساتىپ الۋشىلار ازايعان جوق. سەبەبى حالىق ءۇشىن جىلجىمايتىن مۇلىك قۇنىن جوعالتپايتىن ينۆەستيتسيا بولىپ قالا بەرمەك.
www.24.kz