قىتايدىڭ عارىشتاعى جوسپارى قانداي؟

جارتى جىل بويى وربيتادا بولعان «شەنجوۋ-13» عارىش كەمەسىنىڭ ەكيپاجى قۇرىلىستىڭ ءبىرىنشى كەزەڭىن ءساتتى اياقتادى. جازدا وسى كەشەنگە كەلەسى ەكيپاج اتتانۋى كەرەك. «شەنجوۋ-13» عارىش كەمەسىنىڭ ەكيپاجى وربيتادا جارتى جىل جۇمىس ىستەدى. بۇل قىتاي ءۇشىن رەكوردتىق كورسەتكىش. ال ۆان ياپين اشىق عارىشقا شىققان ەلدەگى تۇڭعىش ايەل بولدى.
يان حۋن، ق ح ر عارىش تەحنولوگيالار اكادەمياسى عارىش ستانتسياسىنىڭ باس جوبالاۋشىسى:
- نەگىزگى مودۋل وربيتادا ءبىر جىلداي ۇشىپ ءجۇر. وسى مەزگىلدە عارىش ينجەنەرلەرى بارلىق كوزدەلگەن مىندەتىن ءساتتى ورىندادى. ەكى پيلوتتى عارىش كەمەسى جانە ەكى جۇك اپپارىتىمەن ءتۇيىسىپ، «شەنجوۋ-12» جانە «شەنجوۋ-13» كەمەلەرىنىڭ ەكيپاجدارى ءۇش جانە التى اي وربيتادا جۇمىس ىستەدى. وعان قوسا، عارىشكەرلەر تىرشىلىكتى قامتاماسىز ەتۋ جانە ستانتسيانى قۇراستىرۋ سەكىلدى نەگىزگى تەحنولوگيالاردى تەكسەردى. قول جەتكىزگەن ناتيجەلەرى جوسپاردان دا اسىپ ءتۇستى. ەل بيلىگى عارىش ستانتسياسىن قۇراستىرۋدىڭ ەكىنشى كەزەڭىنە كىرىسەتىنىن جاريالادى.
مامىر ايىندا وعان جۇك كەمەسىن جىبەرۋ كوزدەلىپ وتىر. ال ماۋسىم ايىندا «شەنجوۋ-14» كەمەسىنىڭ ەكيپاجى جارتى جىلعا اتتانىپ، ستانتسيانى قۇراستىرۋدى اياقتاۋى ءتيىس. نەگىزگى مودۋلگە زەرتحانالىق ەكى مودۋل قوسىلادى. وسىدان كەيىن «شەنجوۋ-15» كەمەسىنىڭ ەكيپاجى ارىپتەستەرىن اۋىستىرىپ، جارتى جىل ءۇش ءمودۋلدى ستانتسيادا جۇمىس ىستەيدى.
حاو چۋن، ق ح ر پيلوتتى عارىشكەرلىك باعدارلاما كەڭسەسىنىڭ جەتەكشىسى:
- قىتاي پيلوتتى عارىشكەرلىگىن دامىتۋدا عارىشتى بەيبىت قولدانۋ، تەڭدىك پەن ءوزارا پايدا قاعيداتتارىن ۇستانادى. ءبىرقاتار ەل مەن ۇيىمدارمەن ىنتىماقتاسۋ كەلىسىمدەرىنە قول قويىپ، بىرلەسكەن جوبالاردى جۇزەگە اسىرۋدا ۇلكەن ناتيجەلەرگە جەتتىك. قىتايدىڭ وربيتالىق ستانتسياسىن تاعدىرى ورتاق دۇنيەجۇزىلىك قاۋىمداستىقتى قۇرۋ ماقساتىنداعى پلاتفورماعا اينالدىرۋعا دايىنبىز. ءتۇرلى ەلدەردىڭ عارىشكەرلەرى جانە زەرتتەۋشىلەرمەن بىرگە ادامزات يگىسىنە شەكسىز عارىش كەڭىستىگىن زەرتتەۋدى جالعاستىرامىز.
قىتاي بيىل عارىش باعدارلاماسىنىڭ 30 جىلدىعىن اتاپ وتۋدە. وربيتالىق ستانتسيامەن قاتار وزگە باعىتتاردا دا جوبالاردى جۇزەگە اسىرىپ كەلەدى. جەرگە ايدىڭ توپىراعىن جەتكىزدى. بولاشاقتا وعان پيلوتتى كەمەلەر جىبەرىپ، عىلىمي ستانتسيانى اشۋدى كوزدەپ وتىر. قىتاي ا ق ش- تان كەيىن مارستا ءوز روۆەرىن جۇرگىزگەن الەمدەگى ەكىنشى ەل اتاندى. وسىدان ەكى جىل بۇرىن بەيدوۋ سپۋتنيك جۇيەسى جۇمىسىن باستاپ، الەمدەگى ناۆيگاتسيالىق ءتورت جۇيەنىڭ ءبىرى بولدى.
بوتاگوز سىرعابايەۆا
www.24.kz