قىتاي قازاقستان ارقىلى ەۋروپاعا جاڭا ارالاس جۇك باعىتىن ىسكە قوستى

بەيجىڭ. قازاقپارات - قىتايدىڭ سولتۇستىكتەگى شيان قالاسىنان گەرمانيانىڭ مانگەيم قالاسىنا جاڭا جۇك پويىزى باعىتى ىسكە قوسىلدى.

ۇزىندىعى 11,3 مىڭ شاقىرىمدى قۇرايتىن جول قازاقستان ارقىلى وتەدى، ونىڭ ىشىندە كاسپي مەن قارا تەڭىزدەردى كەسىپ وتەدى، دەپ حابارلايدى قازاقپارات مەنشىكتى ءتىلشىسى.

42 كونتەينەر تيەلگەن العاشقى قۇرام ءساۋىر ايىنىڭ ەكىنشى ونكۇندىگىندە شيان قالاسىنان شىقتى. جاڭا باعىت - ارالاس، ياعني تەمىرجول جانە تەڭىز جۇك تاسىمالى. ول گەرمانيانىڭ مانگەيم قالاسىنا كەلگەنگە دەيىن قازاقستان، ازەربايجان، گرۋزيا، ورتالىق جانە شىعىس ەۋروپا ەلدەرى ارقىلى وتەدى. جاڭا باعىت شيان مەن ەۋروپاداعى لوگيستيكالىق حابتار اراسىندا جۇرەتىن 16- جۇك پويىزى.

ەسكە سالا كەتەيىك، «قىتاي- ەۋروپا» باعىتى بويىنشا العاشقى جۇك پويىزى شيان قالاسىنان 2013 -جىلى جولعا شىققان بولاتىن. 2022 -جىلدىڭ ءبىرىنشى توقسانىنىڭ قورىتىندىسى بويىنشا شيان ەۋروپاعا بارلىعى 790 جۇك پويىزىن جونەلتكەن. بيىلعى جىلدىڭ اقپان ايىندا چيڭداۋ تەڭىز پورتىنان (شاندۋڭ پروۆينتسياسى، شىعىس قىتاي) قازاقستان ارقىلى گەرمانياعا جۇك پويىزدارىنىڭ جاڭا باعىتى ىسكە قوسىلعان بولاتىن. ول كەزدە دە سوڭعى پۋنكت رەتىندە مانگەيم قالاسى بەلگىلەنگەن ەدى. قىتايلىق لوگيستيكالىق كومپانيالاردىڭ مالىمەتى بويىنشا، 2021 -جىلى شاندۋڭ پروۆينتسياسىندا «قىتاي- ەۋروپا» باعىتىنداعى 1,8 مىڭنان استام جۇك پويىزى وڭدەلگەن. گەرمانيانىڭ فەدەرالدىق ستاتيستيكالىق باسقارماسىنىڭ ستاتيستيكاسى كورسەتكەندەي، گەرمانيا مەن قىتاي اراسىنداعى ساۋدا اينالىمىنىڭ كولەمى 2021 -جىلى الدىڭعى جىلمەن سالىستىرعاندا 15,1 پايىزعا ارتىپ، 278,5 ميلليارد دوللاردى قۇراعان.