بايزاقتاعى جارىلىستا جوعالىپ كەتكەن ساربازدى ءالى ىزدەپ جاتىرمىز – مينيستر

«مەن ونىڭ اتا- اناسىمەن كەزدەستىم. قىس مەزگىلىندە اۋا- رايىنىڭ قولايسىزدىعىنا بايلانىستى ىزدەۋدى ۋاقىتشا توقتاتتىق. ءبىز قازىر ۋتيليزاتسيا جۇمىستارىن باستادىق. سايكەسىنشە وسى اسكەري قىزمەتشىنىڭ سۇيەگىن دەپ ايتقىم كەلمەيدى، جالپى ىزدەستىرۋ جۇمىستارى جالعاسۋدا. ول ءتىپتى جارىلىستىڭ ەپيتسەنترىندە بولسا دا، ەشتەڭە قالماۋى مۇمكىن ەمەس قوي. قانداي دا ءبىر ناتيجە شىقسا، حابارلايمىز»، - دەدى ر. جاقسىلىقوۆ ءماجىلىس وتىرىسىنان كەيىن تىلشىلەرگە بەرگەن سۇحباتىندا.
مينيستر قازىر ۋاقىت پەن مەرزىم تۋرالى ايتۋ قيىن ەكەنىن جەتكىزدى.
«سەبەبى وندا ءالى دە كوپ جۇمىس جۇرگىزۋ كەرەك. ونىڭ وتباسىن دا تۇسىنەمىن. ءبىز ولارعا حابار- وشارسىز مەرت بولدى دەپ تانۋدى ۇسىندىق، سوندا الەۋمەتتىك تولەمدەر دە، قارۋلى كۇشتەر تاراپىنان تولەمدەر بولار ەدى. ءبىراق وتباسىن دا جاقسى تۇسىنەمىز جانە ىزدەۋدى جالعاستىرامىز. ىزدەۋ جۇمىستارىن بىزبەن قاتار ىشكى ىستەر ورگاندارى دا جۇرگىزىپ جاتىر»، - دەدى ر. جاقسىلىقوۆ.
ەسكە سالا كەتسەك، 26-تامىز كۇنى جامبىل وبلىسىنىڭ بايزاق اۋدانىندا وق- ءدارى قويماسىنان ءورت شىعىپ، ارتىنان جارىلعانى حابارلانعان بولاتىن. وقيعا سالدارىنان بارلىعى 17 ادام قازا تاپتى. ولاردىڭ اراسىندا ىشكى ىستەر ورگانىنىڭ قىزمەتكەرلەرى، اسكەريلەر مەن توتەنشە جاعدايلار قىزمەتىنىڭ وكىلدەرى، اسكەري پروكۋرور بار. سونداي- اق اسكەري قىزمەتشى باۋىرجان داۋىتبايەۆ جوعالىپ، ونىڭ ىزدەستىرىلىپ جاتقانى جاريالاندى.