اكىمنىڭ ورىنباسارى قوقىس جيناماعانى ءۇشىن جازالاندى - اقمولا وبلىسى

كوكشەتاۋ. قازاقپارات - اقمولا وبلىسىنىڭ تايتوبە اۋىلىندا رۇقساتسىز توگىلگەن قوقىس ورىندارى ءۇشىن اكىمىنىڭ ورىنباسارى جازالاندى، دەپ حابارلايدى قازاقپارات ءتىلشىسى.

اقمولا وبلىسى بويىنشا ەكولوگيا دەپارتامەنتىنىڭ مامانى كۇلاش راحيموۆانىڭ ايتۋىنشا، وبلىستا زاڭداستىرىلعان قاتتى تۇرمىستىق قالدىقتار پوليگوندارىنىڭ سانى جەتكىلىكسىز. سونىمەن بىرگە، وڭىردە بىردە ءبىر قوقىس وڭدەۋ زاۋىتى جوق. قازىرگى وبلىس اۋماعىندا 130 قاتتى تۇرمىستىق قالدىقتار ءۇيىندىسى بولسا (تەك جەر اكتىسى بار)، ونىڭ 24-دە عانا رۇقسات قۇجاتتارى بار.

«تۇرمىستىق قالدىقتار كوبىنەسە قالا نەمەسە ەلدى مەكەن سىرتىنداعى پوليگوندارعا شىعارىلادى. سونىمەن قاتار پوليگونداردىڭ كولەمى جىلدام ۇلعايىپ، جاقىن ارادا جاقىن ەلدى مەكەندەرگە جەتەدى. پوليگونداردىڭ سالدارىنان قورشاعان ورتانىڭ ەكولوگيالىق جاعدايىنىڭ ناشارلاۋى ادامداردىڭ دەنساۋلىعىنا كەرى اسەر ەتەدى جانە قاۋىپتى اۋرۋلارعا اكەلىپ سوعۋى مۇمكىن. وسىنداي رۇقسات ەتىلمەگەن قوقىس ءۇيىندىسى سەلينوگراد اۋدانىنىڭ تايتوبە اۋىلى اۋماعىندا پايدا بولدى. بۇل ءبىر جىلدا عانا ەمەس، بىرنەشە جىلدا جينالعان قوقىستار»، - دەيدى كۇلاش راحيموۆا.

بۇل جاعدايعا بايلانىستى تايتوبە اۋىلىندا جاعداي بويىنشا جەرگىلىكتى اتقارۋشى ورگاندار ءتيىستى شارا قابىلداماعان. وسىعان بايلانىستى لاۋازىمدى تۇلعالالار مەن كوممۋنالدىق كاسىپورىنداردىڭ باسشىلارى جازاعا تارتىلعان.

«وتكەن جىلى ەكولوگيا دەپارتامەنتى تەكسەرىس قورىتىندىسى بويىنشا ق ر اكىمشىلىك قۇقبۇزۋشىلىق تۋرالى كودەكستىڭ 344-بابى بويىنشا رۇقساتسىز ورنالاستىرىلعان قوقىس تاستايتىن جەرلەردى جويۋ بويىنشا شارالار قابىلداماعانى ءۇشىن سەلينوگراد اۋدانىنىڭ تۇرعىن ءۇي - كوممۋنالدىق شارۋاشىلىعىنىڭ ءبولىم باسشىسىنىڭ مىندەتىن اتقارۋشى ۆ. اسامبايەۆ اكىمشىلىك جازاعا تارتىلدى. بيىل ءدال وسىنداي اكىمشىلىك جازاعا سەلينوگراد اۋدانى اكىمىنىڭ ورىنباسارى تارتىلدى. سونىمەن بىرگە، تايتوبە كەنتىندە قاتتى تۇرمىستىق قالدىقتاردى زاڭسىز ورنالاستىرۋعا قاتىستى «قوسشى تازالىق» ج ش س- نە (قوقىس شىعارۋشى كومپانيا) قاتىستى تەكسەرۋ جۇرگىزىلدى. ونىڭ قورىتىندىسى بويىنشا كاسىپورىن باسشىلىعى جازالاندى»، - دەپ تولىقتىردى كۇلاش راحيموۆا.

ماماننىڭ اقپاراتىنا قاراعاندا، سەلينوگراد اۋدانىنىڭ اكىمدىگىمەن رۇقساتسىز ورنالاستىرىلعان قوقىس تاستايتىن جەرلەردى جويۋ ءۇشىن وبلىستىق بيۋدجەتتەن 100 ميلليون تەڭگە كولەمىندە قاراجات ءبولىندى.

«سەلينوگراد اۋدانىنىڭ اكىمدىگى تايتوبە اۋىلى ماڭىنداعى ۇيىندىلەردى سۇرىپتاۋ جانە ودان ءارى قالپىنا كەلتىرۋ جولىمەن جويۋ بويىنشا ءتيىستى شارالار قولعا الىناتىن بولادى. سونىمەن بىرگە، وسى اۋماققا ودان ءارى قوقىس تاستاماۋ ءۇشىن شلاگباۋم قويىلادى»، - دەپ تۇيىندەدى ول.

اۆتور: اسلان وسپانوۆ