ەستە ساقتاۋدىڭ ەرەكشە ادىستەرى

نۇر- سۇلتان. قازاقپارات - ءبىر مالىمەتتى بىرنەشە رەت قايتالاي بەرۋ ارقىلى جاتتاپ الۋ عىلىم تىلىندە مەحانيكالىق ەس دەپ اتالادى.

ونىڭ ناتيجەسى ۇزاققا سوزىلمايدى. سول ساتتە كوپ كۇش سالساڭىز دا، ۋاقىت وتە كەلە تەز ۇمىتىلىپ قالادى. ال اقپاراتتى ءتۇسىنىپ، لوگيكاعا سالىپ، ءار كومپونەنتىنە جەتە ءمان بەرۋ ارقىلى ساناعا سىڭىرىلگەن مالىمەتتىڭ جادتا ساقتالۋى دا ۇزاققا سوزىلادى.

ءبىز ادەتتە مەكتەپ كەزىندە ماجبۇرلىكپەن كوپ ولەڭ جاتتايمىز. الايدا قازىر ءار ولەڭنىڭ تەك 1-2 شۋماعىن عانا ەسكە تۇسىرە الامىز.

نەمىس پسيحولوگى گ. ەببينگاۋز ماعىناسىز بۋىنداردى جاتتاۋداعى ەرەكشەلىكتەردى اشتى.

ادام ۇزاق قاتاردى قايتالاپ، ەسكە ساقتاعان كەزدە، سوڭىندا تۇرعان ماتەريال تەز ەسكە تۇسەدى ەكەن.

زەرتتەۋلەر ناتيجەسى بويىنشا، العاشقى 1 ساعاتتان سوڭ الىنعان اقپاراتتىڭ %60 ى ۇمىتىلادى، ال 6 كۇننەن كەيىن باستاپقىدا دا جاتتالعان بۋىنداردىڭ %20 بولىگى عانا ەستە قالادى ەكەن.

قاجەتتى اقپاراتتى ەستە قالدىرۋ ءۇشىن:

- ارنايى ماقسات قويىپ، مەڭگەرۋگە شىن تالپىنۋ؛

- بولاشاقتا قانشالىقتى قاجەت بولاتىنىن سەزىنۋ؛

- تەرەڭنەن ويلانىپ، مالىمەتتىڭ ءمان-ماعىناسىن ءتۇسىنىپ، باسقا دا قۇبىلىستارمەن اسسوتسياتسيا جاساۋ؛

- قابىلدانعان اقپاراتتى ىشتەي وڭدەپ، بۇرىنعى ءوز ويلارىمەن ۇشتاستىرىپ، قورىتىندى تۇجىرىم شىعارۋ؛

- ۇنەمى قايتالاۋ.

قاجەتتى مالىمەتتى جاتتاعاننان كەيىن، ەستە ساقتاۋ ءۇشىن 40 مينۋتتان كەيىن تاعى قايتالاۋ كەرەك.

ءبىرىنشى كۇنى اراعا ۋاقىت سالىپ 2-3 رەت، ەكىنشى كۇنى 1-2 رەت، 3-7 كۇننەن كەيىن 1 رەت قايتالاسا، 100 رەت قايتالاعاننان دا ارتىق بولادى.

Massaget.kz